لە کوردستان بانگدان بە دوو شێواز قەدەغە دەكرێت

ئاڤا نیوز

 

سەرۆكی بانگبێژانی كوردستان ڕایدەگەیەنێت، "بانگدانیان لە مزگەوتەكانی هەرێمی كوردستان بە شێوازی ئێرانی و توركی قەدەغە كردووە و مەبەستیانە كلتوور و شووناسی نەتەوەیی و ئایینی لەبەرچاو بگرن."

 

وێنە گەورەكە: ئێستا لە هەزار و 200 مزگەوتی پارێزگای هەولێر و بەشێك لە مزگەوتەكانی پارێزگای دهۆك و ئیدارەی سەربەخۆی زاخۆ، بانگدان بۆ نوێژە فەرزەكان لەڕێگەی ئامێری ئەلیكترۆنییە، لە ئاییندەیەكی نزیکدا سەرجەم مزگەوتەكانی هەرێمی كوردستان دەگرێتەوە، بەجۆرێك ژمارەیەك بانگبێژی دەنگخۆش دیاریكراون و لە مزگەوتی سەواف لە شاری هەولێر بانگ دەدەن و لەسەرجەم مزگەوتەكان پەخش دەكرێت.

 

لێدوانی فەرمی: حاجی كاوە شاكر، سەرۆكی بانگبێژانی كوردستان و قورئانخوێنی ناسراوی كورد تایبەت بە ئاڤا میدیا ڕایگەیاند:

 

- ڕۆژانە دوو بانگبێژی دەنگخۆش لە مزگەوتی سەواف لە شاری هەولێر بەشێوەی زیندوو بانگ دەدەن و پەخشی دەنگەكانیان لە بڵندگۆی سەرجەم مزگەوتەكانی پارێزگای هەولێر دەبیسترێت.

 

- بانگبێژەكان سەرپشك كراون بە هەرجۆرە ئاوازێك بانگ بدەن بەو مەرجەی بەشێوازی ئێرانی و توركی نەبێت و لە پێنج بانگی ڕۆژانەدا هەمووجۆرە ئاوازەكان بەكاربهێنن.

 

- مەبەستمانە بانگدان لە مزگەوتەكانی هەرێمی كوردستان مۆركی شوناسی نەتەوەیی و ئایینی پێوە دیاربێت و لاسایی وڵاتانی دیكە نەكەینەوە.

 

ئەوەی پێویستە بیزانیت: سەرۆكی بانگبێژانی كوردستان دەڵێت، بەكارهێنانی دەستەواژەی 'بانگدانی ئەلیكترۆنی' بۆ ئەو پڕۆژەیەی بەڕێوەبەرایەتیی ئەوقافی هەولێر دروست نییە، بەڵكو ڕاستەوخۆ لەڕێگەی ستۆدیۆوە بانگ دەدرێت و لەڕێگەی هێڵی ئینتەرنێتەوە بۆ هەموو مزگەوتەكان دەگوازرێتەوە.

 

خاڵە ئەرێنییەكان: هەرچەندە لەگەڵ دەستپێكردنی پڕۆژەی بانگدانی ئەلیكترۆنی بەشێك لە هاووڵاتییان ئەمەیان بە كارێكی ناشەرعی وەسف دەكرد، بەڵام ئێستا پێشوازی زۆرینەی خەڵك و مامۆستایانی ئایینی لێكراوە و ئاماژە بەوە دەكەن، پێشتر كەسانی دەنگ ناخۆش بەشێوازی نەشاز لە مزگەوتەكان بانگیان دەدا و ناڕەزایی خەڵكی لێ دەكەوتەوە، بەڵام ئێستا كەسانی شارەزا و پسپۆڕ لەبواری بانگدان بە دەنگە خۆشەكانیان دڵ و دەروونی هاووڵاتییانی كوردستانیان ئاسوودە كردووە.