سەرۆکی هاوپەیمانیی سیادە: دەوڵەت باوکی هەموو عێراقییەکانە، نابێ باوک مووچەی بەشێکی وڵاتەکەی ببڕێت

ئاڤا نیوز

 

سەرۆكی هاوپەیمانیی سیادە بڕینی مووچەی خەڵكی كوردستان لەلایەن بەغداوە بە هەڵەیەكی گەورە وەسف دەكات، دووپاتیشی كردەوە، دەوڵەت باوکی هەموو عێراقییەکانە، نابێ باوک مووچەی بەشێکی وڵاتەکەی ببڕێت.

 

چیرۆکی سەرەکی: خەمیس خەنجەر، سەرۆكایەتی هاوپەیمانیی سیادە دەکات کە هاپەیمانییەکی بە‌هێزی سوننەکانە و لە دوایین هەڵبژاردن دا توانیان 14 کورسی لە پەرلەمانی عێراق مسۆگەر بکەن. هاپەیمانی سیادە بەدۆستێکی نزیکی کورد دادەنرێن و لە ڕابردوودا پاڵپشتی بڕیارەکانی هەرێمی کوردستانیان کردووە. 

 

لێدوانی فەرمی: خەمیس خەنجەر، سەرۆكی هاوپەیمانیی سیادە لەبارەی بڕینی مووچە و بودجەی کوردستان بە ئاڤای وتی، لە 2010ـەوە عێراق باجی پێشێلکردنی دەستوور دەدات. چەندین ماددە و بڕگەی دەستووری پێشێل کراون. بۆ نمونە بڕینی مووچە، هەڵەیەكی گەورە بوو بەرامبەر خەڵكی كوردستان كرا. دەوڵەت باوکی هەموو عێراقییەکانە و دەبێ نوێنەرایەتی هەموو پێکهاتەکان بکات، نابێ باوک مووچەی بەشێکی وڵاتەکەی ببڕێت.

 

خەمیس خەنجەر بەپێویستی دەزانێت، ئەمجارە كات دابنرێت بۆ جێبەجێكردنی ڕێككەوتنەكان، بەو پێیە دەسەڵاتداران زۆربەی كات لە بەڵێن و ڕێككەوتنەكان پەشیمان دەبنەوە و ئەمەش لە ئەزموونی ڕابردوو دەرکەوتووە.