سەرۆکوەزیران بارزانی لە ئەمریکاوە: پێویستە دەستوور ناوبژیوان بێت

ئاڤا نیوز

سەرۆکوەزیرانی بارزانی لە ئەمریکاوە پەیامێک لەبارەی کێشەکانی نێوان هەولێر و بەغدا بڵاودەکاتەوە و بەپێویستی دەزانێت دەستوور ناوبژیوان بێت.

چیرۆکی سەرەکی: مەسرور بارزانی، سەرۆکوەزیرانی هەرێمی کوردستان، ئەمڕۆ پێنجشەممە لە میانی سەردانەکەیدا بۆ واشنتن لەگەڵ  ژمارەیەک کۆنگرێسمان کۆبووەوە،  دواتر لە تۆڕی کۆمەڵایەتی ئێکس پەیامێکی بڵاوکردەوە.

لێدوانی فەرمی: سەرۆکوەزیران بارزانی نووسیویەتی "بە دۆستانی کۆنگرێسم گوت پێویستە دەستووری عێراق ناوبژیوانی خاک بێت، ئەوەی لایەنەکان لە ساڵی 2005ـدا واژۆیان لەسەر کردووە". ئاماژەی بۆ ئەوەش کردووە "ناکۆکییەکانمان بەرهەمی لاوەکی جێبەجێنەکردنی دەستوورە؛ با ڕەگی کێشەکە چارەسەر بکەین".

لەلایەکی دیکەوە: هەر ئەمڕۆ سەرۆکوەزیران بارزانی بە جیا لەگەڵ ئەندامی کۆنگرێس ماریۆ دیاز بالارت کۆبووەوە و چارەسەرکردنی کێشەکانی نێوان هەولێر و بەغدایان لە سەر بنەمای دەستوور تاوتوێ کرد.

ڕاگەیێنراوی فەرمی: هەردوولا هاوڕابوون لەسەر گرنگیی پاراستنی ئاسایش و سەقامگیریی هەرێمی کوردستان، ڕێزگرتن لە قەوارەی دەستووریی هەرێم، پاراستنی مافی پێکهاتەکان و بەردەوامبوونی پشتیوانیی هێزی پێشمەرگە لەلایەن ئەمەریکا و هاوپەیمانیی نێودەوڵەتی.