هەسەدە کوشتنی شەش چەکداری نزیک لە تورکیای لە بەنداوی تشرین ڕاگەیاند

ئاڤا نیوز 

 

هێزەکانی سووریای دیموکرات (هەسەدە) دەڵێت، لە شەڕ و پێکدادانەکانی دوێنێی نێوان هێزەکانیان و گرووپەکانی ئۆپۆزسیۆن لە باشوری ڕۆژهەڵاتی مەنبیج 28 چەکداری گرووپەکان کوژراون، چوار ئەندامی هەسەدەش برینداربوون.

 

وێنە گەورەکە: پێنج هەفتەیە شەڕ و پێکدادانەکانی نێوان هەسەدە و گرووپە چەکدارەکانی ئۆپۆزسیۆنی سووریا کە لەلایەن تورکیا پاڵپشتی دەکرێن لە دەوروبەری بەنداوی تشرین بەردەوامە، گرووپەکان دەیانەوێت بەنداوی تشرین لەنێوان کۆبانێ و مەنبیج کۆنترۆڵ بکەن، هەسەدەش بەرگریی لەو پێگەیە دەکات و لە چەند ناوچەیەکیش پێشڕەوی کردووە.

 

ڕاگەیێنراوی فەرمی: ناوەندی ڕاگەیاندنی هەسەدە بڵاویکردەوە، ڕۆژی 13-1-2025، گرووپەکانی ئۆپۆزسیۆن چەند جارێک هێرشیانکردووەتە سەر پێگەکانی هەسەدە لە دەوروبەری بەنداوی تشرین لە باشوری ڕۆژهەڵاتی مەنبیج ، سەرجەم هێرشەکانیش بەرپەرچ دراونەتەوە.

 

هەسەدە ئاماری شەڕ و پێکدادانەکانی بەم شێوەیە بڵاوکردووەتەوە:

- بەهۆی بۆردوومانەکانی تورکیا چوار ئەندامی هەسەدە برینداربوون.
- 28 چەکداری گرووپەکانی ئۆپۆزسیۆن کوژراون.
- 36 چەکداری گرووپەکانی ئۆپۆزسیۆن برینداربوون.
- چوار درۆنیش تێکشکێنراون.
- گرووپەکان لەکاتی پاشەکشەیاندا پێنج ئۆتۆمبێلی زرێپۆش و دوو ئۆتۆمبێلی دیکەی سەربازییان لەدەستداوە.
- هەسەدە 17 کۆبوونەوەی گرووپە چەکدارەکانی بە ئامانج گرتووە.