هەسەدە و ئیدارەی نوێی سووریا چوار لیژنە پێکدەهێنن

ئاڤا نیوز

 

باڵی سیاسی هەسەدە ڕایدەگەیێنێت گفتوگۆکانیان لەگەڵ دیمەشق بەردەوام دەبن، لەگەڵ ئیدارەی نوێی سوریا ڕێککەوتوون چوار لیژنەی سەربازی و ئابووری و ئەمنیی و ئیداریی پێکبهێنرێن و گەشبینین لە چەند ڕۆژی داهاتوودا هەندێک ڕێککەوتن بكرێن.

 

وێنە گەورەکە: دوای ڕووخانی ڕژێمەکەی بەشار ئەسەد، ئەحمەد شەرع دەیەوێت حکومەتی داهاتووی سووریا سەرجەم پێکهاتە و هێزەکان لەخۆ بگرێت، بۆ ئەو مەبەستەش دوو هەفتە پێش ئێستا لەگەڵ هەسەدە کۆبوونەتەوە. 

 

لێدوانی فەرمی: زاهیر ئەحمەد، بەرپرسی نووسینگەی پەیوەندییەکانی ئەنجوومەنی سوریای دیموکرات “مەسەدە” کە باڵی سیاسی هەسەدەیە، لەمیانی دیالۆگێکدا لە شاری حەسەکەی ڕۆژئاوای کوردستان ڕایگەیاند، بەفەرمی گفتوگۆیان لەگەڵ ئیدارەی نوێی سووریا کردووە و گفتوگۆکانیش بەردەوام دەبن.

ناوەڕۆکی قسەکانی زاهیر ئەحمەد لە ڕاگەیێنراوێکدا خراوەتەڕوو، ئاماژەی بەوەش کردووە هەموو کۆبوونەوەکانیان لەگەڵ دیمەشق ئەرێنی و بەرهەمدار بوون، بۆیە گەشبینین لە چەند ڕۆژی داهاتوودا هەندێک ڕێککەوتن بكرێن.

لەلایەکی دیکەوە: پێشتریش عەلی رەحمۆن، جێگری هاوسەرۆکی مەسەدە ڕایگەیاندبوو، ئیدارەی نوێی سوریا و هێزەکانی هەسەدە ڕێککەوتوون لەسەر پێکهێنانی چوار لیژنەی سەربازیی و ئابووری و ئەمنی و ئیداری. پێکهێنانی لیژنەکان بەمەبەستی ئامادەکارییە بۆ ڕێککەوتنێکی گشتگیر لە هەر چوار بوارەکە.

بڕیارە لە ئایندەیەکی نزیکدا  لە دیمەشق کۆنفرانسێک لەبارەی ئایندەی سووریا بکرێت، زاهیر ئەحمەد دەڵێت: کۆنفرانسەکە سەرکەوتوو نابێت ئەگەر هێزە سیاسی و کۆمەڵایەتییەکان لەخۆ نەگرێت”.

 

هەروەها دەڵێت: “ئێمە پێداگری لەسەر ئەوە دەکەین کە بەشداربین نەك وەك تاک، بەڵکو دەبێت بەشداریكردنمان وەک هێزی بنەڕەتی بێت کە ناوچەکەیان پاراستووە و ئەزموونی سیاسی و ئیداری و سەربازییان هەیە”.