لە ڕێگەی ئاڤا میدیاوە بەدواداچوون بۆ چارەنووسی کۆچبەرێکی کورد دەکرێت

ئاڤا نیوز

کۆچبەرێکی کورد ماوەی چەند مانگێکە لە ڕێگای نێوان تورکیا و بولگاریا بێ سەروشوێن بووە و تا ئێستا چارەنووسی نادیارە، کەسوکارەکەی لە ڕێگەی ئاڤا میدیاوە بە دواداچوونی بۆ دەکەن.


وێنە گەورەکە: كۆچبەرێكی كورد كە لە هەرێمی كوردستانەوە بەڕێكەوتووە بۆ ئەوەی بگاتە ئەوروپا و لە ڕێگەی نێوان توركیا و بولگاریا بەهۆی ئەوەی نەخۆشیی شەكرەی هەبووە دۆخی تەندروستیی تێكچووە و هاوڕێكانی كەمێك هەوڵیان لەگەڵ داوە و پاشان جێیان هێشتووە، چەند مانگێكە ئەو گەنجە كۆچبەرە كوردە بێسەروشوێنە.

لێدوانی فەرمی: عەبدولخالق محەممەد، بەرپرسی ڕاگەیاندن و پەیوەندیی فەرمانگەی پەیوەندییەكانی دەرەوەی حكومەتی هەرێمی كوردستان بە ئاڤا میدیای ڕاگەیاند:

- دوای ئەوەی زانیارییەكەمان بەدەست گەیشت ڕاستەوخۆ دەستمان بە بەدواداچوون و گرتنەبەری ئەو ڕێكارانە كردووە كە بۆ دۆزینەوەی هەر كۆچبەرێكی بێسەروشوێنبوو پێویستە بگیرێتە بەر.

- بە ئەركی خۆمان دەزانین، بەدواداچوون بۆ چارەنووسی هەر هاووڵاتییەك بكەین كە بێسەروشوێن بێت لە هەر وڵاتێكی جیهان، پێشتریش توانیومانە چارەنووسی چەندین هاووڵاتی و كۆچبەر ئاشكرا بكەین و دەیان كۆچبەر لەو ڕێگەیەوە ڕزگار كراون.

لەلایەکی دیکەوە: بەپێی وتەی  هاوڕێكانی: كۆچبەرەكە لە ڕێگەی نێوان توركیا و بولگاریا بێسەروشوێن ون بووە، بەڵام لە سنووری توركیا بێسەروشوێن بووە، "ئێمەش لەڕێگەی كونسوڵخانەی توركیا و كەناڵە فەرمییەكانی دیكەی توركیا سەرقاڵی بەدواداچوونین بۆ ئەوەی سۆراغی ئەو گەنجە كۆچبەرە كوردە ئاشكرا بكەین، بۆ ئەو مەبەستە ناو و كۆپی پاسپۆرت و چەند بەڵگەنامەیەكی دیكەی كۆچبەرەكەمان بۆ ئەو لایەنە فەرمییانە ناردووە، هەر كاتێك گەیشتینە هەر ئەنجامێك بێگومان ئاشكرای دەكەین".