مەسرور بارزانی و بافڵ تاڵەبانی لەبارەی پێکهێنانی حکومەت کۆبوونەوە

ئاڤا نیوز

سەرۆکوەزیران مەسرور بارزانی و بافڵ تاڵەبانی، سەرۆکی یەکێتیی نیشتمانی کوردستان لە هەولێر لەبارەی پێکهێنانی کابینەی نوێی حکومەت کۆبوونەوە، ئەمەش دەبێتە یەکەم کۆبوونەوەی نێوانیان دوای پرۆسەی هەڵبژاردن.

وێنە گەورەکە: ئەم کۆبوونەوەیە لە چوارچێوەی دەستپێشخەرییە نیشتمانییەکەی مەسرور بارزانی دێت بۆ یەکڕزی و یەکهەڵوێستی لایەنە سیاسییەکانی کوردستان دێت بەرامبەر حکومەتی عێراق بۆ بەدەستهێنانی مافە دەستوورییەکانی خەڵکی کوردستان، هەر ئەم دەستپێشخەرییە هۆکارێک بوو بۆ خێراترکردنی هەنگاوەکانی پێکهێنانی کابینەی ١٠ی حکومەتی هەرێمی کوردستان. 

لێدوانی فەرمی: هۆشیار زێباری، ئەندامی دەستەی کارگێڕیی مەکتەبی سیاسیی پارتی دەڵێت:

- کۆبوونەوەکە دوێنێ چوارشەممە کراوە، زۆر بە ئارامیی بەڕێوەچووە و مەسرور بارزانی و بافل تاڵەبانی گفتوگۆی ڕاشکاوانە و بونیاتنەرانەیان کردووە.

-  هاوتەریبە لەگەڵ پڕۆسەی دانوستانەکانی نێوان پارتی و یەکێتی بۆ هەرچی زوو پێکهێنانی کابینەی نوێی حکومەتی هەرێمی کوردستان".

بۆچی گرنگە: چاوەڕێ دەکرێت کۆبوونەوەی نێوان سەرۆکوەزیران مەسرور بارزانی و بافڵ تاڵەبانی هۆکارێکی کاریگەر بێت بۆ هەرچی زووە پێکهێنانی کابینەی دەیەمی حکومەتی هەرێمی کوردستان. ئەمەش دوای کەمتر لە سێ مانگ لە بەڕێوەچوونی خولی شەشەمی پەرلەمانی کوردستان دێت.

باکگراوند: پارتی و یەکێتی تاوەکو ئێستا چوار کۆبوونەوەیان لەبارەی پێکهێنانی حکومەت کردوون، دوو کۆبوونەوەی سیاسی بوون و دوو کۆبوونەوەیان تەکنیکی بوون. کۆبوونەوە تەکنیکییەکان بۆ نووسینی ڕەشنووسی کارنامەی حکومەتی نوێ و دابەشکردنی دەسەڵاتەکان بوون.