نمایش و خۆدەرخستنی پێشمەرگە لە سۆشیاڵ میدیا قەدەغە دەکرێت

ئاڤا نیوز

بڵاوكردنەوەی وێنە و ڤیدیۆ لە تۆڕە كۆمەڵایەتییەكان بەتایبەت تیكتۆك لەلایەن ژمارەیەك لە فەرماندە و ئەفسەری سەربازی و پێشمەرگەوە خەریكە لە حاڵەتەوە دەبێتە دیاردە، وەزارەتی پێشمەرگەش بە فەرمانێكی وزاری كۆتایی بەم حاڵەتە دەهێنێت.

چیرۆکی سەرەکی: ڕۆژی 6-1-2025، وەزارەتی پێشمەرگە فەرمانێكی وزاری بە ژمارە 60 دەركردووە، بەپێی ناوەڕۆكی فەرمانەكە كە لە سێ خاڵ پێكهاتووە لەمەودوا، نمایش و خۆدەرخستنی ڕیكلامی و بڵاوكردنەوەی چالاكیی كەسیی فەرماندە و ئەفسەر و پێشمەرگە بە جلوبەرگی سەربازی لە بنكە و بارەگا سەربازییەكان قەدەغەیە، وەزارەتی پێشمەرگە حاڵەتەكە بە دیاردەی ناشارستانی و نەشیاو ناودەهێنێت و دەڵێ لە ئاداب و ڕەوشتی جوانی پێشمەرگە ناوەشێتەوە.

زانیاریی زیاتر: وەزارەتی پێشمەرگە تەشهیر و ناوزڕاندن قەدەغە دەکات بەرامبەر هەر كەسێك بكرێت، ئینجا بە پۆستكردن یان كۆمێنت یان بڵاوكردنەوەی وێنە بێت، دەشڵێت ئەنجامدەرانی بە توندترین سزای یاسایی لێپێچینەوەی لەگەڵ دەكرێت و دەدرێتە دادگە.

ئەوەی پێویستە بیزانیت: هەر فەرماندە و ئەفسەر و پێشمەرگەیەك ئەم كارانە بكات، ئەوا سزای یاسایی دەدرێت، بۆ ئەو مەبەستەش هەردوو بەڕێوەبەرایەتیی ڕاگەیاندن و هەواڵگری لەمەودوا چاودێریی وردی تۆڕە كۆمەڵایەتییەكان دەكەن.