لایەنە سیاسییەكان دژی پارچە پارچەكردنی خانەقین هەڵوێست وەردەگرن

ئاڤا نیوز

لایەنە سیاسییەكان لە خانەقین دژی پارچە پارچەكردنی قەزاكە هەڵوێست وەردەگرن و داوا دەكەن ئەنجوومەنی پارێزگای دیالە لە پێشێلكاریی دەستووری و كارگێڕی پاشگەزبێتەوە.

وێنە گەورەكە: ئەنجوومەنی پارێزگای دیالە لە كۆتا كۆبوونەوەی خۆیدا بڕیاری دا بەوەی هەریەك لە ناحیەكانی جەلەولا، قەرەتەپە و بەنی سەعد بكرێن بە قەزا و ناحیەیێكی نوێ بەناوی "حەمرین" بهێنرێتە كایەوە، ئەوەش نیگەرانی لایەنە سیاسییەكانی سنووری ئیدارەی قەزای خانەقینی لێ كەوتەوە.

ڕاگەیێنراوی فەرمی: هەریەك لە پارتی دیموكراتی كوردستان، یەكێتیی نیشتمانیی كوردستان، ڕێكخراوی بەدر، پارتی سۆسیالیست دیموكراتی كوردستان و حزبی شیوعیی كوردستان، لەسەر ئاستی قەزای خانەقین بەیاننامەیەكیان بڵاو كردووەتەوە و تێیدا ئاماژە بەوە دەكەن، بڕیاری بە قەزاكردنی جەلەولا و قەرەتەپە و بەنی سەعد و هەوڵدان بۆ دروستكردنی شارەدێی دیكە، لەسەر بنەمای لێكۆڵینەوەی پێویست نەكراون و پێشێلكاریی مافی دانیشتووان و پێكهاتەكانی خانەقینە.

بابەتە ستراتیژییەکە: بەگوێرەی ماددەی (140)ـی دەستووری هەمیشەیی عێراق، خانەقین یەكێكە لە ناوچە جێناكۆكەكانی نێوان هەردوو حكومەتی فیدراڵی و هەرێمی كوردستان و نابێت پێش یەكلاكردنەوەی چارەنووسیان، گۆڕانكاریی لە سنووری ئیدارییاندا بكرێت.

خاڵە نەرێنییەكان: پێنج لایەنی سیاسی سنووری قەزای خانەقین بۆچوونیان وایە ئەم هەنگاوە دەبێتە هۆكاری زیادكردنی ئاڵۆزیی سیاسی و كۆمەڵایەتیی و زیان بە بونیاتی كۆمەڵایەتی و پێكهاتەیی ناوچەكە دەگەیەنێت. 

چارەسەرەکان: لایەنە سیاسییەكان داوایان لە ئەنجوومەنی وەزیرانی حكومەتی فیدراڵی و ئەنجوومەنی پارێزگای دیالە و حكوومەتی خۆجێی كردووە كە لەو بڕیارەیان پاشگەز ببەنەوە، دژی هەر هەنگاوێكن "بۆ پارچە پارچەكردنی قەزای خانەقین و كەمكردنەوەی ڕۆڵی ئیداریی قەزاكە".