ئەحمەد شەرع: ئیسرائیل بەبیانووی بوونی میلیشیاكانی ئێران هاتووەتە نێو خاكی سووریا

ئاڤا نیوز

فەرماندەی ئیدارەی نوێی سووریا ڕایدەگەیەنێت، هیچ پاساوێك بۆ هەبوونی هێزەكانی ئیسرائیل لەنێو خاكی سووریا نەماوە و پێویستە بكشێتەوە.

وێنە گەورەكە: شێخ محەممەد بن عەبدولڕەحمان ئال سانی، سەرۆكوەزیرانی قەتەر ئەمڕۆ پێنجشەممە 16-1-2025 بە سەردانێكی فەرمی گەیشتە دیمەشق و لەگەڵ ئەحمەد شەرع، فەرماندەی ئیدارەی نوێی سووریا كۆبووەوە، دواتر لە كۆنگرەیەكی ڕۆژنامەوانیدا تیشیكیان خستەسەر خاڵەكانی كۆبوونەوەكە.

لێدوانی فەرمی: ئەحمەد شەرع، فەرماندەی ئیدارەی نوێی سووریا ڕایگەیاند:

- قەتەر لە ماوەی ساڵانی پڕ لە نەهامەتی، یارمەتییەكی زۆری خەڵكی سووریای داوە و هەوڵی كەمكردنەوەی ئازارەكانی داون، ئاماژەی بەوەشكرد، گفتوگۆكانی لەگەڵ سەرۆكوەزیرانی قەتەر هەموو سێكتەرەكانی گرتووەتەوە.

- هەموو لایەك هاوڕان لەسەر ئەوەی پێشڕەوییەكانی ئەمدواییەی ئیسرائیل بۆ نێو خاكی سووریا، هەڵەیە و هیچ پاساوێكی نییە و پێویستە ئیسرائیل هێزەكانی بكشێنێتەوە.

- ئیسرائیل بەبیانووی هەبوونی میلیشیا ئێرانییەكان و ئەندامانی حیزبوڵڵا دەستوەردانی سەربازی لە سووریا دەكات، سەرجەم لایەنە نێودەوڵەتییەكانمان لە پابەندبوونی ئیدارەی نوێی سووریا بە ڕێككەوتی ساڵی 1974 ئاگاداركردووەتەوە و ئامادەیی خۆمان بۆ پێشوازیکرن لە هێزەکانی نەتەوە یەکگرتووەکان و پاراستنیان دەڕبڕیوە.