ئاراس شێخ جەنگی بۆ ئاڤا: کاتی هاتووە کاک مەسعود ببێتە برا گەورەی کورد

ئاڤا نیوز

ئاراس شێخ جەنگی لە تۆڕی کۆمەڵایەتی فەیسبووک پۆستێکی کردووە و دەڵێت، گەورەیی کاک مەسعود بارزانی دەرکەوت و ئیتر کاتی ئەوەیە ببێت بە برا گەورە بۆ ڕێکخستنەوەی ناو ماڵی کورد، کۆبوونەوەی لەگەڵ مەزڵووم عەبدی بۆ هەموو کورد دڵخۆشکەرە.

لێدوانی فەرمی: دوای بڵاوکردنەوەی پۆستێکی فەیسبووک لە ئەکاونتێک بە ناوی "ئاراز جەنگی تاڵەبانی" لەبارەی ڕۆڵی سەرۆک بارزانی لەم قۆناغە، ئاڤا پەیوەندیی بە ئاراس شێخ جەنگی کرد ئەو وتی، "بەڵێ پەیامەکە هی منە".

ئاراس شێخ جەنگی لە پۆستەکەیدا بە دیاریکراوی دەڵێت: گەورەیی کاک مەسعود ئەمڕۆ دەردەکەوێ، بڵاوبوونەوەی دەنگۆی سەردانی مەزڵووم بۆ لای کاک مەسعود دڵخۆشکەرە بۆ هەموو کورد، ئیتر کاتی ئەوەیە کاک مەسعود ببێت بە برا گەورە بۆ ڕێکخستنەوەی ناو ماڵی کورد.

هۆکارە زانراوەکان: ئەم پەیامەی ئاراس شێخ جەنگی لەکاتێکدایە ئەمڕۆ لە هەولێر سەرۆک بارزانی و مەزڵووم عەبدی کۆبوونەتەوە. ئێوارەی ئەمڕۆ پێنجشەممە هۆشیار زێباری ئەندامی دەستەی کارگێڕیی مەکتەبی سیاسیی پارتی دیموکراتی کوردستان لە تویتێک ئەوەی ڕاگەیاند.

ئەوەی پێویستە بیزانیت: ئاراس شێخ جەنگی، تا ڕووداوەکانی هەشتی تەمموزی 2021 لەناو یەکێتی نیشتمانی کوردستان کاری سیاسی دەکرد، بەڵام دوای ئەو ڕووداوە پەیوەندی بەو حیزبەوە نەماوە.