ناوەڕۆکی کۆبوونەوەی سەرۆک بارزانی و مەزڵووم عەبدی ئاشکرا کرا

کوردستان
2025-01-16

شەیری بکە لە:

ناوەڕۆکی کۆبوونەوەی سەرۆک بارزانی و مەزڵووم عەبدی ئاشکرا کرا

دیمەنێک لە کۆبوونەوەی سەرۆک مەسعود بارزانی و مەزڵووم عەبدی، سەرچاوە: بارەگای بارزانی

ئاڤا نیوز

بارەگای بارزانی ناوەڕۆکی کۆبوونەوەی سەرۆک بارزانی و مەزڵووم عەبدی ئاشکرا کرد و ڕایگەیاند، جەختیان کردووەتەوە پێویستە لایەنە کوردییەکانی سووریا بەبێ دەستوەردانی هیچ لایەنەک و بە ئاشتیانە بڕیار لە چارەنووسی خۆیان بدەن، لەپێناو زامنکردنی مافەکانی کوردیش یەکڕیز و یەکهەڵوێست بن.

چیرۆکی سەرەکی: ئێوارەی ئەمڕۆ لە پیرمام کۆبوونەوەیەکی گرنگ و مێژوویی کرا لەبارەی ئایندەی کورد لە سووریا و ناوچەکە، سەرۆک بارزانی لەگەڵ مەزڵووم عەبدی، فەرماندەی گشتیی هێزەکانی سووریای دیموکرات (هەسەدە) کۆبووەوە و دوواین بارودۆخی سووریا و ئایندەی کوردیان لەو وڵاتە تاوتوێ کرد.

ڕاگەیێنراوی فەرمی: بەپێی ڕاگەیێنراوێکی بارەگای بارزانی، لە دیدارەکەدا چەند بابەتێک تاوتوێ کراون:

٠ بارودۆخ و دوایین پێشهاتە ئەمنی و سیاسییەکانی سووریا، چوارچێوەی گشتیی مامەڵەکردنی لایەنە کوردییەکان لەگەڵ بارودۆخی تازەی سووریا و چۆنیەتیی گرتنەبەری هەڵوێستێکی هاوبەشی لایەنە کوردییەکانی سووریا تاوتوێ کراون.

٠ جەخت کراوەتەوە پێویستە لایەنە کوردییەکانی سووریا بەبێ دەستوەردانی هیچ لایەنەک و بە ڕێکاری ئاشتیانە بڕیار لە چارەنووسی خۆیان بدەن، لەپێناو زامنکردنی مافەکانیان بە یەکڕیزی و یەکهەڵوێستیی هاوبەش لەگەڵ حکومڕانانی تازەی سووریا بگەنە لێک تێگەیشتن و ڕێککەوتن.

٠ لایەنە کوردییەکانی سووریا فاکتەری ئاشتی و سەقامگیری بن و ڕێگری بکەن لە دووبارەبوونەوەی ئەو نەهامەتییانەی بەسەر گەلی کورد و پێکهاتەکانی تری سووریادا هاتوون.

ئەوەی پێشبینی دەکرێت: چاوەڕێ دەکرێت دوای نزیکبوونەوەی لایەنە ناکۆکەکانی ڕۆژئاوای کوردستان، پەیام و داواکاری کورد بەرامبەر دیمەشق یەکبخرێن و بە یەک تیم گفتوگۆ لەگەڵ دەسەڵاتدارانی نوێی سووریا بکەن، ئەمەش بە ئامانجی دابینکردنی مافەکانی کورد و مسۆگەرکردنی ئایندەی کورد لە سووریای نوێدا.

باکگراوند: کۆبوونەوەکە دوای ئەوە دێت نوێنەری سەرۆک بارزانی، د.عەبدولحەمید دەربەندی سەرەتای ئەم هەفتەیە سەردانی ڕۆژئاوای کوردستانی کرد و لەگەڵ هەریەکە لە مەزڵوم عەبدی و ئەنەکەسە کۆبووەوە، پەیامی سەرۆک بارزانی پێ گەیاندن بۆ ئەوەی یەکڕیز و یەکهەڵوێست بن. ئەوکات مەزڵووم عەبدی پێشوازی لە دەستپێشخەرییەکە کرد و بە گرنگی دانا. پێشتریش مەزڵووم عەبدی داوای هاوکاری لە سەرۆک بارزانی کردبوو.