نەوەی نوێ بڕیار لەبارەی بەشداریكردن لە حكومەت دەدات

ئاڤا نیوز

نەوەی نوێ لەسەر ئاستی سەركردایەتیی و فراكسیۆنەكەی كۆدەبێتەوە و بڕیار لەسەر بەشداریكردن یاخود بەشداری نەكردن لە كابینەی دەیەمی حكومەتی هەرێمی كوردستان دەدات.

وێنە گەورەكە: هەنگاوەكانی پێكهێنانی كابینەی نوێی حكومەتی هەرێمی كوردستان لەنێوان لایەنە براوەكانی هەڵبژاردن خێراتر بووە، جووڵانەوەی نەوەی نوێ كە بە مسۆگەركردنی 15 كورسی براوەی سێیەمی هەڵبژاردنی خولی شەشەمی پەرلەمانی كوردستانە، تا ئێستا خۆی یەكلایی نەكردووەتەوە كە بەشداری حكومەت دەكات یاخود نا، سەرەڕای ئەوەش لەماوەی ڕابردوودا مەرجی قورسی بۆ بەشداریكردن لە حكومەت بە لایەنە سەرەكییەكانی پێكهێنەری حكومەت گەیاندبوو.

لێدوانی فەرمی: عومەر مامەكوردە، ئەندامی ئەنجوومەنی سەركردایەتیی جووڵانەوەی نەوەی نوێ لە پارێزگای هەولێر ڕایدەگەیەنێت، شەممەی داهاتوو 18-1-2025، لەسەر ئاستی سەركردایەتیی و فراكسیۆنی نەوەی نوێ لە پەرلەمانی كوردستان كۆدەبنەوە و بڕیاردەدەن لەسەر بەشداریكردن یاخود بەشداری نەكردن لە حكومەتی داهاتووی هەرێمی كوردستان.

ئەوەی پێویستە بیزانیت: لە ماوەی دانووستانەكانی لایەنەكان شاندی نەوەی نوێ بەجیا لەگەڵ شاندی پارتی و یەكێتی كۆبووەتەوە، مەرج و داواكارییەكانی خۆی بە شاندی هەردوو حیزب گەیاندووە.