سەفین دزەیی: دەمانەوێت نوێنەری وڵاتان لە کێشەکانی نێوان هەولێر و بەغدا لە وێنە گەورەکەدا بن

ئاڤا نیوز

 

شاندی هەرێمی کوردستان پێش ئەوەی دۆسیەی کێشە هەڵواسراوەکانیان ببەنە بەغدا لە هەولێر لەگەڵ نوێنەری وڵاتان کۆدەبنەوە و دیدگای حکومەتی هەرێمی کوردستان بۆ چارەسەری کێشەکان خستە ڕوو، بەرپرسی فەرمانگەی پەیوەندیەکانی دەرەوەی هەرێمی کوردستانیش لەوبارەیەوە دەڵێت، "دەمانەوێت نوێنەری وڵاتان لە وێنە گەورەکەدا بن."

 

وێنە گەورەکە: هەولێر هەنگاوەکانی بۆ گرەنتیکردنی مافەکانی لە بەغدا خێرا دەکات، بۆ ئەوەی پێش هەموار و پەسەندکردنی خشتەی بودجەی 2025، پشکی هەرێمی کوردستان لە یاسای بودجە بدرێت و هەناردەی نەوت دەستپێبکاتەوە. لە میانەیەشدا شاندێکی هەرێمی کوردستان لەگەڵ نوێنەری وڵاتان لە هەولێر کۆبوونەوە و دیدگای هەرێمی کوردستانیان لەبارەی کێشەکان خستەڕوو.

 

لێدوانی فەرمی: سەفین دزەیی، بەرپرسی فەرمانگەی پەیوەندیەکانی دەرەوەی حکومەتی هەرێم بە ئاڤای گووت، "ئەوەیە دوای ئەو هەموو تۆمەتانەی ئاراستەی هەرێمی کوردستان دەکرێت کە پابەندی ڕێککەوتنەکان نابێت، ویستمان نوێنەری وڵاتان و کۆمەڵگەی نێودەوڵەتی لە وێنە گەورەکەدا بن و ڕاستی و دروستی داتاکان بۆ ئەوان بخەینەڕوو."

 

زانیاریی زیاتر: شاندی هەرێمی کوردستان پێکهاتبوون لە ئاوات جەناب، وەزیری دارایی و دارا ڕەشید، وەزیری پلاندانان و د. ئومێد سەباح، سەرۆکی دیوانی ئەنجوومەنی وەزیران و عەبدولحەکیم خەسرەو، سەرۆکی فەرمانگەی هەماهەنگی و بەدواداچوون و ئامانج ڕەحیم، سکرتێری ئەنجوومەنی وەزیران.