بەرپرسێكی ئەنەكەسە: ئێستا كاتی دانیشتن و ڕێككەوتنی هەسەدە و ئەنەكەسەیە

ئاڤا نیوز

بەرپرسی ئەنەكەسە لە هەرێمی كوردستان دەڵێ، دوای دیدارەكەی سەرۆك بارزانی و مەزڵووم عەبدی، ئیدی ئێستا كاتی ئەوەیە هەسەدە و ئەنەكەسە دابنیشن و ڕێكبكەون و ببنە یەك دەنگ.

چیرۆكی سەرەكی: ڕۆژی پێنجشەممە 16-1-2025، لە هەولێر، سەرۆك بارزانی و مەزڵووم عەبدی، فەرماندەی گشتیی هێزەکانی سووریای دیموکرات (هەسەدە) كۆبوونەوە و ئەمە  بە هەنگاوێكی گرنگ بۆ یەكگرتنی لایەنە سیاسییە كوردییەكانی ڕۆژئاوای كوردستان دادەنرێت بۆ ئەوەی كورد بە یەك دەنگ بەشداریی لە دانوستاندن لەگەڵ ئیدارەی تازەی سووریا بكات.

لێدوانی فەرمی: جەدعان عەلی، بەرپرسی نوێنەرایەتیی ئەنەكەسە لە هەرێمی كوردستان بە ئاڤا میدیای ڕاگەیاند:

- دیدارێكی مێژوویی بوو، كورد زۆر پێویستیی بە ئەم جۆرە دیدارانە هەیە، هەموو داواكارییەكان بۆ ئەوەن كە لایەنە سیاسییە كوردییەكانی ڕۆژئاوای كوردستان یەكگرتوو و یەكدەنگ بن.

- سەرۆك بارزانی بەردەوام پشتیوانیی خۆی بۆ كوردانی ڕۆژئاوای كوردستان  دووپات كردووەتەوە و ئێستا داواكاریی ئەو ئەوەیە كە لایەنە سیاسییەكان یەكگر بن، ئامادەیی خۆیشی بۆ هەر هاوكارییەك كە پێویست بێت ڕاگەیاندووە.

- لە دۆخی ئێستای سووریا كە حكومەتێكی نوێ پێكدەهێنرێت، ئەگەر كورد لە گوتارێك زیاتری هەبێت بێگومان دەبێتە هۆی لاوازیی و مافەكانی لەدەست دەدات، بۆیە یەكگوتاریی داخوازیی هەمووانە.

- چوونی نوێنەری سەرۆك بارزانی بۆ ڕۆژئاوای كوردستان و پاشان كۆبوونەوەی سەرۆك بارزانی و مەزڵووم عەبدی لە هەولێر، گەشبینییەكی گەورەی لای خەڵكی ڕۆژئاوای كوردستان دروست كرد.

- ئەنجامەكانی ئەو كۆبوونەوانە لە ڕۆژانی داهاتوو دیاردەكەوێت و ئاستەنگییەكانی بەردەم پەیوەندیی نێوان لایەنە سیاسییە كوردییەكانی ڕۆژئاوای كوردستان نامێنن و ئێستا كاتی ئەوە هاتووە كە هەسەدە و ئەنەكەسە دابنیشن و ڕێكبكەون.

ئەوەی پێویستە بیزانیت: چەند ڕۆژێك پێش ئێستا عەبدولحەمید دەربەندی، نوێنەری سەرۆك بارزانی، سەردانی ڕۆژئاوای كوردستانی كرد و لەگەڵ كەسی یەكەمی هەردوو لایەنی سەرەكیی ڕۆژئاوای كوردستان هەسەدە و ئەنەكەسە كۆبووەوە و پەیامی سەرۆك بارزانی پێگەیاندن.