گۆڕانکاری لە دەرهێنانی مۆڵەتی شۆفێری دوورە لە ڕاستی

ئاڤا نیوز

دەنگۆی بڵاوبوونەوەی گۆڕانکاری لە دەرهێنانی مۆڵەتی شۆفێری لە هەرێمی کوردستان هاووڵاتییانی نیگەران کردبوو، چونکە باس لە زیاد بوونی ڕسوومات دەکرا، ئاڤا بەدواداچوونی بۆ ئەم بابەتە کردووە.

چیرۆکی سەرەکی: چەند رۆژێکە لە تۆڕە کۆمەڵایەتییەکان و هەندێک لە میدیاکان دەنگۆی ئەوە بڵاوکراوەتەوە، کە گوایە لە 1- 2- 2025  گۆڕانکاری لە دەرهێنانی مۆڵەتی شۆفێریدا دەکرێت، دیارترین گۆڕانکاریش وانە خوێندنە بۆ ماوەی 21 ڕۆژ و شۆفێری کردنە بۆ ماوەی 12 ڕۆژ و زیاترکردنی ڕسوماتەکانە، دوای بەدواداچوونی ئاڤا دەرکەوت کە هیچ نووسراوێکی فەرمی لەسەر ئەم بابەتە نیە.

لێدوانی فەرمی: عەمید ئاسۆ محەممەدئەمین، بەڕێوەبەری پۆلیسی هاتووچۆی پارێزگای سلێمانی، بە ئاڤا میدیای ڕاگەیاند: ئەوەی لە تۆڕەکۆمەڵایەتییەکان سەبارەت بە گۆڕانکاری لە مۆڵەتی شوفێری بڵابۆتەوە هیچ بنەمایەکی نییە و تەنیا دەنگۆیە و هیچ نووسراوێکی فەرمی لەسەر ئەم بابەتە نیە.

ئەوەی پێویستە بیزانیت: بە پێی یاسا هەموو کەسێک مافی دەرهێنانی مۆڵەتی شۆفێری هەیە، بۆ مۆڵەتی شۆفێری جۆری تایبەت دەبێت کەسەکە تەمەنی لە 18 ساڵ زیاتر و بۆ مۆڵەتی گشتی دەبێت تەمەنی لە 20 ساڵ زیاتر بێت و هەڵگری ڕەگەزنامەی عێراقی بێت.