لەڕێگەی ئاڤا میدیاوە داوایەک ئاڕاستەی کوردانی کەنەدا دەکرێت

ئاڤا نیوز 

 

لە کەنەدا سەرژمێریی بۆ ژمارەی دانیشتووانی کورد دەکرێت و چالاکوانانیش لە ڕێگەی ئاڤا میدیاوە پەیامێک ئاڕاستەی کوردانی کەنەدا دەکەن.

 

وێنە گەورەکە:  سەرژمێرییەکە لەڕێگەی ئۆنلاینەوە دەکرێت و تاوەکو ئێستا نزیکەی دوو هەزار خێزان تۆمارکراون، بەڵام پرۆسەکە بەشێوەیەکی خاو بەڕێوە دەچێت و چالاکووانانیش داوا لە کوردان دەکەن بەدەم پرۆسەکەوە بچن.

 

لێدوانی فەرمی: شێروان ئازاد کە چالاکووانێکی مافەکانی مرۆڤە و سەرپەرشتی پرۆژەکە دەکات بە ئاڤا میدیای ڕاگەیاند:  ئەو خێزانانەی لە سەرژمیرییەکەدا تۆمارکراون، 45.8% کوردی باشووری کوردستانن، 28.5% کوردی ڕۆژهەڵات، 14.5%  کوردی باکوور، 11.3% کوردی ڕۆژئاوای کوردستانن.

 

ئەوەی پێویستە بیزانیت: چالاکووانان لەڕێگەی ئاڤا میدیاوە داوا لە کوردانی کەنەدا دەکەن خۆیان لە سەرژمیرییەکە تۆمار بکەن و پرۆسەکە بەجددی وەربگرن، چونکە ئەم سەرژمێرییە کاریگەریی لەسەر پێدانی خزمەتگوزاریی بە زمانی کورد دەبێت لەلایەن وڵاتی کەنەداوە.

 

زانیاریی زیاتر: لە سەرژمێرییەکەدا چوار پرسیار لە کوردانی دانیشتووی کەنەدا دەکرێت کە ئەمانەن:

 

- لە کام بەشی کوردستانەوە هاتوویت بۆ کەنەدا؟

 -لە کام ویلایەت و شار دەژین؟

 -ژمارەی ئەندامانی خێزانەکەت چەند کەسە؟

-ژمارە مۆبایل و ئیمەیڵی خێزانەکە؟

 

بۆچی گرنگە: فەرمانگەکانی حکومەتی کەنەدا خزمەتگوزاریی بە زمانەکانی عەرەبی، فارسی و زمانەکانی دیکە پێشکەش دەکات، ئەگەر ژمارەی ڕاستەقینەی کورد لە کەنەدا دەربکەوێت، ئەوا بە زمانی کوردی خزمەتگوزاریی پێشکەش دەکرێت، هاوکات لە کتێبخانەکاندا گۆشەیەک بۆ کتێبە کوردییەکان دادەنرێت.