فڕۆکە جەنگییەکانی تورکیا لە نزیک بەنداوی تشرین هێزێکی هەسەدە دەکەنە ئامانج

ئاڤا نیوز

 

هێرشەکانی تورکیا و گرووپە چەکدارەکانی نزیک لەو وڵاتە بۆ سەر هێزەکانی هەسەدە لە دەوروبەری بەنداوی تشرین بەردەوامە.

 

وێنە گەورەکە: لە دوای کەوتنی دەسەڵاتی بەشار ئەسەد لە 8-12-2024، لەماوەی 40 ڕۆژی رابردوودا، ڕووبەڕوبوونەوەی توند لە نێوان گرووپە چەکدارەکانی نزیک لە تورکیا و هێزەکانی هەسەدە لە بەنداوی تشرین دەستی پێکردووە و تا ئێستاش بەردەوامە.

 

لێدوانی فەرمی: ڕوانگەی سووری بۆ مافەکانی مرۆڤ ڕایگەیاند: پێکدادانی توند لە نێوان هێزەکانی سووریای دیموکرات هەسەدە و "سوپای نیشتمانی" نزیک لە تورکیا ڕوویدا و هێزی ئاسمانی تورکیاش ئەو ناوچانەی هەسەدە پێشڕەوی تیادا کردووە بۆردومان دەکات. 

 

لە لایەکی دیکەوە: بەپێی بڵاوکراوەی میدیاکانی ڕۆژئاوای کوردستان، درەنگی شەوی ڕابردوو، سێ جار فرۆکە شەڕکەرەکانی تورکیا بە چری بۆردوومانی دەوروبەری بەنداوی تشرینیان کردووە و ئۆتۆمبێلێکیش لە شارۆچکەی عەین عیسا پێکراوە، لە ئەنجاندا سێ کەس برینداربوون.

 

باکگراوند: لە سەرەتای دەستپێکردنی شەڕ لە نێوان هێزەکانی هەسەدە و گرووپە چەکدارەکانی نزیک لەو وڵاتە لە 12-12-2024، بەپێی ئامارەکانی ڕوانگەی سووری بۆ مافەکانی مرۆڤ، تا ئێستا 411 کەس لە هەردوولا کوژراون کە 300 کەسییان ئەندامی گرووپە چەکدارەکانن.