ئاڤا نوێترین زانیاریی سەبارەت بە 12 گەنجە كوردە دەستگیركراوەكەی لیبیا ئاشكرا دەكات

ئاڤا نیوز

 

هەڵسوڕێنەری كاروباری باڵیۆزخانەی عێراق لە لیبیا نوێترین زانیاری سەبارەت بە ئەو 12 گەنجە كوردەی كە ویستوویانە لەڕێگەی لیبیاوە بگەنە ئەورووپا بەڵام لەو وڵاتە دەستگیركراون ئاشكرا دەكات.

 

چیرۆکی سەرەکی: بە هەوڵی وەزارەتی دەرەوەی عێراق و لیژنەی پەیوەندییەکانی دەرەوەی پەرلەمانی عێراق لەڕێگەی باڵیۆزخانەی وڵاتەكە لە لیبیا، توانراوە 12 کۆچبەری کوردی خەڵكی هەرێمی كوردستان لە زیندانێكی لیبیا ئازاد بکرێن و بڕیارە لەم نزیکانە بگەڕێندرێنەوە هەرێمی کوردستان.

 

لێدوانی فەرمی: د.ئەحمەد سەحاف، هەڵسوڕێنەری كاروباری باڵیۆزخانەی عێراق لە لیبیا بە ئاڤا میدیای ڕاگەیاند: باڵیۆزخانەی عێراق لە ساڵی 2024 نزیكەی 23 كۆچبەری عێراقیی گەڕاندووەتەوە كە ویستوویانە لە ڕێگەی لیبیاوە بگەنە ئەورووپا، دوو ڕۆژ پێش ئێستا سۆراغی 12 كۆچبەری خەڵكی هەرێمی كوردستانمان ئاشكرا كرد كە لە ڕێگەی تۆڕێكی بازرگانی بە مرۆڤەوە هەوڵدراوە بە ڕێگەی قاچاخ بگەیێنرێنە ئەورووپا.

 

هەڵسوڕێنەری كاروباری باڵیۆزخانەی عێراق لە لیبیا ڕایگەیاند:-

- سەرجەم كاروبارەكانمان بۆ ئەو 12 كۆچبەرە كوردە ئەنجام داوە و تەنانەت پاسپۆرتیشمان بۆ دەرهێناون و بەم نزیكانە دەگەڕێندرێنەوە هەرێمی كوردستان.
- ئەو 12 كۆچبەرە خەڵكی هەردوو پارێزگای هەولێر و سلێمانین و لەڕێگەی تۆڕە كۆمەڵایەتییەكانەوە لەلایەن ژمارەیەك قاچاخچییەوە هەڵخەڵەتێندراون.

- قاچاخچێتی بە مرۆڤ بە تاوانێكی گەورە هەژمار دەكرێت، داوا دەكەین خەڵك نەكەوێتە تەڵەی قاچاخچییەكانەوە، پەیوەندیمان بە خێزانەكانی ئەو 12 كۆچبەرە كردووە و پێمانڕاگەیاندوون كە دۆخی تەندروستییان جێگیرە و هەموو رێككارەكان تەواو دەكەین و دەیانگەڕێنینەوە بۆ هەرێمی كوردستان.