قەڵای هەولێر شەوانیش بەڕووی سەردانیکاران دەکرێتەوە

ئاڤا نیوز

 

شەقام و کۆڵانەکانی ناو قەڵای هەولێر بەشێوەیەکی ستانداردی کەلەپووری جیهانی نۆژەنکراونەتەوە، لە ئایندەیەکی نزیکدا چایخانەی كولتووری و هۆتێل و چێشتخانەش لەسەر قەڵا دەكرێتەوە و گەشتیاران دەتوانن لە شەوانیشدا سەردانی قەڵا بکەن. 

 

وێنە گەورەکە: نۆژەنکردنەوەی قەڵای هەولێر لە ژێر چاودێریی ڕاستەوخۆی سەرۆكوەزیران مەسرور بارزانی، سەرۆکی حكومەتی هەرێمی کوردستان دەكرێت، ئێستا نۆژەنکردنەوەی شەقامی سەرەکیی قەڵاش لە قۆناغی کۆتایدایە.

 

لێدوانی فەرمی: لەبارەی بەردەوامی پڕۆسەی نۆژەنکردنەوەکەش، ئەندازیار فەلاح حەسەن، سەرۆکی کۆمسیۆنی باڵای بووژاندنەوەی قەڵای هەولێر بە وەکالەت ڕایگەیاند، تاوەکو ئێستا 10 هەزار و 600 مەتر چوارگۆشە لە شەقامی سەرەکیی قەڵا و بەشێک لە کۆڵانەکان بەردڕێژ کراون و پڕۆسەکەش لە قۆناغی کۆتاییە.

 

زانیاریی زیاتر: لە ئایندەیەکی نزیکدا کۆتایی بە پڕۆسەی نۆژەنکردنەوەی حەمامی قەڵا دێت کە کۆنترین حەمامی هەولێرە و نۆژەکردنەوەی حەمامی قەڵاش لەلایەن حکومەتی ئەمریکاوە پشتیووانیی دارایی دەکرێت.

 

لەناو قەڵای هەولێردا چی دەکرێت:-

-  لە قۆناغی داهاتوودا کورسیی دانیشتن و ڕووناکی بۆ شەقامی قەڵا و کۆڵانەکان دادەندرێن.

-  ڕووبەری سەوزای زیاد دەکرێت و داری زیاتر دەچێندرێن.

-  گۆڕەپانی بەردەم دەرگای سەرەکیی قەڵا نۆژەن دەکرێتەوە و بەردڕێژ دەکرێت.

-  پلانیش هەیە خانووەکانی قەڵا نۆژەن بکرێنەوە و چایخانەیەکی کولتووری و چێشتخانە و هۆتێلێكیش لە قەڵا دروست بکرێن.

 

ئەوەی پێویستە بیزانیت: جگە لە کردنەوەی لە ڕۆژدا، بڕیار وایە شەوانیش دەرگای قەڵا بەڕووی گەشتیاران و سەردانیکەران بکرێتەوە.