پەرلەمانی عێراق لەبارەی هەناردەکردنەوەی نەوتی کوردستان دەنگ دەدات

ئاڤا نیوز


سبەی پەرلەمانی عێراق بۆ دەنگدان لەسەر چەند پرۆژە یاسایەک لەنێویاندا هەمواری یاسای بودجە و دەستپێکردنەوەی هەناردەی نەوتی هەرێمی کوردستان کۆدەبێتەوە. سەرۆکی لیژنەی داراییش ڕایگەیاند، ئەم هەموارکردنە خاڵی دەستپێکە بەرەو بوونیادنانی پەیوەندییەکی یاسایی لە نێوان حکومەتی فیدراڵی و حکومەتی هەرێمی کوردستان لە بەڕێوەبردنی سامانی نەوتدا.

بۆچی گرنگە: بەگوێرەی هەمواری یاسای بودجە، تێچووی بەرهەمهێنان و گواستنەوەی نەوتی کوردستان لە 6 دۆلارەوە بۆ 16 دۆلار زیاد دەکرێت، لەسەر ئەو بنەمایەش بڕیارە هەناردەی نەوتی هەرێمی کوردستان ڕاستەوخۆ دەستپێبکاتەوە.

چیرۆکی سەرەکی: پێش کۆبوونەوەی سبەی پەرلەمانی عێراق بۆ دەنگدان لەسەر هەمواری یاسای بودجە و دەستپێکردنەوەی هەناردەی نەوتی هەرێمی کوردستان. لیژنەی دارایی پەرلەمان بە سەرۆکایەتیی عەتوان عەتوانی کۆبووەوە.

لێدوانی فەرمی: عەتوان عەتوانی، سەرۆکی لیژنەی دارایی لە پەرلەمانی عێراق لەبارەی ناوەڕۆکی کۆبوونەوەکە، ڕایگەیاند:

- لیژنەی دارایی لە گفتوگۆکردن لەسەر هەموارکردنەوەی یاسای بودجە هەنگاوی گەورەی ناوە، پەرۆشی ئەوەین بە شێوەیەک بێت کە جێبەجێکردنی و پابەندبوونی پێی مسۆگەر بکرێت.

- ئەم هەموارکردنە خاڵی دەستپێکە بەرەو بوونیادنانی پەیوەندییەکی یاسایی لە نێوان حکومەتی فیدراڵی و حکومەتی هەرێمی کوردستان لە بەڕێوەبردنی سامانی نەوتدا.

- ئامانجمان لە پەسەندکردنی ئەم هەموارکردنە ئەوەیە کە هەناردەکردنی نەوتی هەرێم بخەینە ژێر دەسەڵاتی حکومەتی فیدراڵی.

- پەرۆشی ئەوەین بڕگەی یاسایی پابەندکەر دابنێین بۆ چارەسەرکردنی پرسی تێچووی بەرهەمهێنانی نەوتی هەرێمی کوردستان.

ئەوەی پێویستە بیزانیت: بەگوێرەی کارنامەی دانیشتنی ڕۆژی یەکشەممە 19-1-2025ـی پەرلەمانی عێراق بڕگەکانی دانیشتنەکە بریتین لە:

یەکەم: دەنگدان لەسەر پڕۆژەیاسای دەزگای هەواڵگریی نیشتیمانیی.

دووەم: دەنگدان لەسەر هەمواری پرۆژەیاسای بودجە.

سێیەم: دەنگدان لەسەر هەمواری چوارەمی یاسای وەبەرهێنان.

چوارەم: دەنگدان لەسەر پێشنیازە یاسای سەندیکای پرۆگرامسازانی عێراق.

پێنجەم: دەنگدان لەسەر پێشنیازە یاسای هەمواری یەکەمی بنەماکانی هاوتاکردنی بڕوانامە و پلەی زانستی.

شەشەم: خوێندنەوەی یەکەم بۆ پرۆژەیاسای ڕێکخستنی کرێی خزمەتگوزارییەکان.

حەوتەم: خوێندنەوەی یەکەم بۆ پێشنیازەیاسای هەمواری یەکەمی دەستە گشتییەکان بۆ چاودێری تەرخانکراوەکانی داهاتەکانی فیدراڵی.

هەشتەم: خوێندنەوەی یەکەم بۆ پێشنیازەیاسای پاراستنی مافی کەمینەکان.