دۆناڵد ترەمپ: 90 ڕۆژ مۆڵەت دەدەینە تیکتۆک

ئاڤا نیوز

ئیدارەی دۆناڵد ترەمپ سەرۆکی هەڵبژێردراوی ئەمریکا پێش ئەوەی تیکتۆک لە ئەمریکا قەدەغە بکات بۆ ماوەی 90 ڕۆژ مۆڵەت دەداتە کۆمپانیای خاوەندارێتی ئەپلیکەیشنەکە تاوەکو بڕیار لەسەر شێوازی بەڕێوبردنی لە ئەمریکا بدات.

لێدوانی فەرمی: دۆناڵد ترەمپ سەرۆکی هەڵبژێردراوی ئەمریکا ڕایگەیاند:

90 ڕۆژ مۆڵەت بە تیکتۆک دەدەین و بە وردی چاودێری دۆخەکە دەکەین، ئەم بڕیارە زۆر گونجاوە و ئەگەر ئەوە بکات کە ئێمە دەمانەوێت، بە ئەگەرێکی زۆرەوە ڕۆژی دووشەممە ڕایدەگەیەنین.

لەلایەکی دیکەوە: ئیدارەی بایدن چەندین جار ڕایگەیاندووە کە پلانی نییە یاساکە جێبەجێ بکات و ئەو بەرپرسیارێتییەی خستۆتە ئەستۆی ترەمپ، بەڵام تیکتۆک ڕۆژی هەینی ڕایگەیاند کە ڕەنگە دڵنیاییەکانی کۆشکی سپی بەس نەبن بۆ ڕێگریکردن لە داخستنی ئەپەکە.

بۆچوونی لایەنی بەرامبەر: تیکتۆک ڕایگەیاندووە: پلانی هەیە ڕۆژی یەکشەممە خزمەتگوزارییەکانیان لە ئەمریکا ڕابگرن ئەگەر لەلایەن ئیدارەی بایدن و وەزارەتی دادی ئەمریکاوە ڕوونکردنەوەیان پێنەدرێت سەبارەت بە بڕیاری قەدەغەکردنی ئەپلیکەیشنەکە.

باکگراوند: جۆ بایدن سەرۆکی ئەمریکا لە مانگی نیسانی ساڵی ڕابردوودا واژۆی لەسەر یاسایەک کرد کە پێویستە کۆمپانیای بایت دانسی خاوەنی تیکتۆک کە بنکەکەی لە پەکینە، ئەپەکە بفرۆشرێتە کۆمپانیایەکی غەیرە چینی ئەگەر نا ئەپلیکەیشنەکە لە سەرتاسەری ئەمریکا قەدەغە دەکرێت.