هۆشیار زێباری: عێراق سكاڵای لە ئەنجوومەنی ئاسایش تۆمار نەكردووە

ئاڤا نیوز

وەزیری پێشووتری دەرەوەی عێراق ڕایگەیاند، هاوپەیمانی نێودەوڵەتی لەسەر داوای حکومەت هاتوون، عێراقیش هێشتا پێویستی پێیان هەیە و دەشڵێت "عێراق هیچ سکاڵایەکی دژ بە ئێران لە ئەنجوومەنی ئاسایش تۆمار نەکردووە".

بۆچی گرنگە: دوای ئەوەی درەنگانی شەوی دووشەممە 15-1-2024، سوپای پاسدارانی ئێران بە چەند مووشەکێکی بالیستيکی هێرشی کردە سەر هەولێر و چەند ناوچەیەکی مەدەنی کردە ئامانج، بەهۆیەوە پێنج کەس گیانیان لەدەستداو شەش کەسیش برینداربوون، ڕووداوەکە کاردانەوەی لێکەوتەوە و عێراق ئەوەی ڕاگەیاند کە لە ئەنجوومەنی ئاسایش سکاڵا تۆماردەکات.

لێدوانی فەرمی: هۆشیار زێباری، وەزیری پێشووتری دەرەوەی عێراق بە ڕادیۆی "مۆنتی کارلۆ"ـی فەرەنسی گوتووە: هێرشەکەی ئێران بۆ سەر هەولێر بەشێکە لە پێشێلکاری بەردەوامی سەروەری عێراق، دوای هێرشەکەش هیچ سکاڵایەکی فەرمی پێشکەش بە ئەنجوومەنی ئاسایش و نەتەوەیەکگرتووەکان نەکراوە، ئەو بابەتە تەنيا ڕاگەیاندنێک بوو لەلایەن حکومەتەوە.

زانیاريی زیاتر: هۆشیار زێباری جەختی لە پاڵپشتی هەرێمی کوردستان بۆ حکومەتی سوودانی کردەوە و گوتی: "بەڵام ئەم پاڵپشتییە تا کۆتایی کراوە نییە، بەوپێیەی ڕێککەوتنێک هەیە کە دەبێت جێبەجێ بکرێت نەک تەنیا بەڵێن بێت".

لەلایەکی دیکەوە: لەبارەی بڕیارەکانی دادگەی فیدراڵی وەزیری پێشووتری دەرەوەی عێراق دەڵێت: دادگە بە شێوەیەکی نادادپەروەرانە مامەڵەی لەگەڵ پێکهاتەکاندا کردووە، بە بێبەشکردنی کورسی نوێنەرایەتیکردنیان لە هەڵبژاردنەکانی داهاتوودا.