نەتەوە یەکگرتووەکان: بۆ گەڕانەوەی پارە بەتاڵانبراوەکان پشتیوانی لە عێراق دەکەین

ئاڤا نیوز

 

بەرنامەی گەشەپێدانی نەتەوە یەکگرتووەکان لە عێراق دەڵێت، بۆ گەڕانەوەی پارە بەتاڵانبراوەکان و ڕووبەڕووبوونەوەی گەندەڵی، پشتیوانی لە عێراق دەکەن و لە ئامادەکردنی پڕۆژە یاسای پەیوەست بەو بابەتانەش پێشنیازیی خۆیان پێشکەش بە حکومەت دەکەن.

 

ئەوەی پێویستە بیزانیت: بەوتەی بەرهەم ساڵح، سەرۆککۆماری پێشووی عێراق،  لەدوای ساڵی 2003ەوە عێراق ملیاران دۆلاری لە داهاتی نەوت دەستکەووتوە، لەو بڕەش نزیکەی 150 ملیار دۆلار بەگەندەڵی براوەتە دەرەوەی عێراق.

 

لێدوانی فەرمی: ئاوکی لوتسما، نوێنەری بەرنامەی گەشەپێدانی نەتەوە یەکگرتووەکان لە عێراق بە ڕۆژنامەی سەباحی نیمچە فەرمی ڕاگەیاندووە: 

 

- پشتیووانی لێکۆڵینەوەی بنکۆڵکاری تایبەت بە دزینی پارەی عێراق و بردنی بۆ دەرەوە دەکەین، بە ئامانجی ئەوەی حکومەتیش بەدواداچوونی بۆ بکات و بۆ وڵات بگەڕێنرێتەوە.

 

- چاودێری هەوڵەکانی تایبەت بە گەڕانەوەی پارە بەتاڵانبراوەکانی عێراق لەڕێگای دادگای مەدەنیی و بەسزاگەیاندنی تاوانبارانی دۆسییەکانی گەندەڵی دەکەین، سەرکەوتنی ئەم هەوڵەش پێویستی بە هەماهەنگی نێودەوڵەتیی هەیە.

 

- هاوکاری حکومەتی عێراق دەکەین تا بتوانێت ئەو پارانە بگەڕێنێتەوە کە لە وڵاتانی دیکە سڕکراون و بڕیاری دادگا لەبارەیانەوە پلەی کۆتاییان وەرگرتووە، هاوکات لەبوارەکانی ئاڵوگۆڕی زانیاری لەسەر مامەڵەی گوماناوی بانکی و سڕکردنی ئەو پارانەی گومانیان لەسەرە پشتیوانی بەغدا دەبین.

 

- هاوکاری هەوڵەکانی عێراق دەبین بۆ بونیادنانی وڵاتێکی دوور لە گەندەڵیی، تا بەهۆیەوە هەموو هاووڵاتیان بتوانن بەشێوەیەکی یەکسان و دادپەروەرانە بە مافەکانیان بگەن.