بەهۆی دژایەتی شیعەکان دەنگ لەسەر هەمواری یاسای بودجە نەدرا

ئاڤا نیوز

 

بەهۆی دژایەتیکردنی پەرلەمانتارانی شیعە، ئەنجوومەنی نوێنەرانی عێراق لەیەکەم هەنگاویدا نەیتوانی هەمواری یاسای بودجە تایبەت بە دەستپێکردنەوەی هەناردەی نەوتی هەرێمی کوردستان پەسەند بکات. 

چیرۆکی سەرەکی: پەرلەمانتارەکان لە پەرلەمانی عێراق نیسابی یاسایی دانیشتنەکەیان شکاند و کۆبوونەوەکەیان دواخست بۆ دانیشتنی داهاتوو، بەو هۆیەشەوە نەتواترا هەمواری یاسای بودجە تایبەت بە دەستپێکردنەوەی هەناردەی نەوتی هەرێمی کوردستان پەسەند بکرێت.
 

هۆکارە زانراوەکان: بەرەی پەرلەمانتارانی پارێزگاکانی ناوەڕاست و خوارووی عێراق وەکو مەرج بۆ تێپەڕاندنی یاساکە ژمارەیەک داواکارییان پێشکەش بە لیژنەی دارایی کرد، لەوانە: هاموارکردنەوەی ماددەی 14 لە یاسای بودجە تا دەرگای دامەزراندن بکرێتەوە و پارەی پترۆدۆلار بۆ پارێزگاکانیان خەرج بکرێت.

 

ئەوەی پێویستە بیزانیت: دەستپێکردنەوەی هەناردەی نەوتی هەرێمی کوردستان ڕێککەوتنی پێشوەختەی هەردوو حکومەتی هەرێم و فیدڕاڵی لەسەرە و داهاتەکەی دەبێت بە بەشێک لە بودجەی گشتی ووڵات، بەڵام بەهۆی نەبوونی کۆدەنگی سیاسی لەنێو ئەنجوومەنی نوێنەران تێپەڕاندنی هەموارەکە بەربەستی بۆ دروستکراوە.