خالید خۆشناو: زیاتر لە %75ی پڕۆژەی فریاگوزاریی خێرای ئاوی هەولێر تەواو بووە

ئاڤا نیوز 

 

خالید خۆشناو، خاوەنی هێمن گرووپ، كە جێبەجێكاری پڕۆژەی فریاگوزاریی خێرای ئاوی هەولێرەوە باس لە پڕۆژەكە دەكات و دەڵێت ئێستا زیاتر لە %75ی پڕۆژەكە تەواو بووە.

 

وێنە گەورەكە: پڕۆژەی فریاگوزاریی خێرای ئاوی هەولێر بە یەكێك لە پڕۆژە گرنگ و ستراتیژییەكانی كابینەی نۆیەمی حكومەتی هەرێمی كوردستان دادەنرێت كە بە گوژمەی 480 ملیۆن دۆلار جێبەجێ دەكرێت و بە تەواوبوونی گرفتی كەمی ئاوی خواردنەوە لە هەولێر بۆ 30 ساڵی داهاتوو، چارەسەر دەكات و پڕۆژەكە لەلایەن هێمن گرووپەوە جێبەجێ دەكرێت.

 

لێدوانی فەرمی: خالید خۆشناو، خاوەنی هێمن گرووپ لە دیدارێكیدا لەگەڵ ئاڤا میدیا سەبارەت بە پڕۆژەی فریاگوزاریی خێرای ئاوی هەولێر ڕایگەیاند: ئێستا پڕۆژە زیاتر لە %75ی تەواو بووە، پشتیوان بەخودا بۆ هاوینی ئەمساڵ ناهێڵین خەڵكی هەولێر بێ ئاوی خواردنەوە بن یاخود گرفتی ئاوی خواردنەوەیان هەبێت، ئێستا بۆرییەكانی پڕۆژەكە گەیشتووەتە زۆرێك لە گەڕەكەكانی شاری هەولێر.

 

- ئێمە وەك هێمن گرووپ هەر كارێك بكەین تاوەكوو كۆتاییەكەی ناوەستین، هەموو پڕۆژەكانی ئێمە ئەوەی تاوەكو ئێستا كردوومانە پێش وادەی خۆیان تەواو بوونە.

- پڕۆژەی ئاوی هەولێر یەكێك لەو پڕۆژانەی كە من زۆرم خۆشدەوێت و تەواوبوونی زۆر دڵخۆشم دەكات، بەهۆی ئەوەی خزمەتێكە بۆ شارەكەمان و پایتەختی هەرێمی كوردستان.

 

ئەوەی پێویستە بیزانیت: پڕۆژەكە 500 كیلۆمەتر بۆری بە قەبارەی جیاواز لەخۆدەگرێت و ئێستا تۆڕی گواستنەوەی ئاو گەیشتووەتە ناو شاری هەولێر و بەر لە تەواوبوونی پڕۆژەكە تۆڕی ئاو بە گەڕەكەكانەوە دەبەسترێتەوە و بە تەواوبوونیشی هەزار بیری ئاو دادەخرێن.