مەکتەبی سیاسیی پارتی: هەڵوەشاندنەوەی بڕیارەکانی بەعس هەنگاوێکی گرنگ و پێویست بوو

ئاڤا نیوز  

دەنگدان و پەسەندکردنی یاسای هەڵوەشاندنەوەی بڕیارەکانی بەعسی هەڵوەشاوە لەلایەن ئەنجوومەنی نوێنەرانی عێراقی فیدراڵ و گەڕاندنەوەی زەوی و زارە زەوتکراوەکان بۆ خاوەنە ڕەسەنەکانیان، کوردەکانی دڵخۆش کرد.

چیرۆکی سەرەکی: بەهۆی هەوڵ و کۆششی ئەندامانی ئەنجوومەنی نوێنەرانی کورد لە پەرلەمانی عێراق، زەوی زاری هاووڵاتییانی کوردی ڕەسەن لە پارێزگای کەرکووک گەڕایەوە، کە پێشتر بە بڕیار و یاسای حزبی بەعس زەویەکانی کورد لەسەر عەرەبەکان تاپۆکرا بوو .

ڕاگەیێنراوی فەرمی: مەکتەبی سیاسیی پارتی دیموکراتی کوردستان، لە ڕاگەیێنراوێکدا ڕایگەیاند: دەنگدان و پەسەندکردنی (یاسای هەڵوەشاندنەوەی بڕیارەکانی بەعسی هەڵوەشاوە) لەلایەن ئەنجوومەنی نوێنەرانی عێراقی فیدراڵ و گەڕاندنەوەی زەوی و زارە زەوتکراوەکان بۆ خاوەنە ڕەسەنەکانیان هەنگاوێکی گرنگ و پێویست بوو.

زانیاریی زیاتر: مەکتەبی سیاسیی پارتی دیموکراتی کوردستان دەستخۆشی لە نوێنەرانی پارتی لە ئەنجوومەنی نوێنەرانی عێراق و فراکسیۆنە کوردستانییەکان دەکات کە ڕۆڵی کوردستانیانە و نیشتمانیانەیان بینی، هاوکات  ڕۆڵی ئەو هێز و لایەنانە بەرز دەنرخێنێت لە تێپەڕاندنی ئەو پڕۆژە یاسایە بە ئامانجی  گەڕاندنەوەی ماف بۆ خاوەن ماف و چارەسەرکردنی غەدرێکی دەیان ساڵە کە بەرامبەر کورد و تورکمانی شاری کەرکووک کراوە.

ئەوەی پێویستە بیزانیت: لە دانیشتنی دوێنێی پەرلەمانی عێراق دەنگ بە پرۆژە یاسای گەڕاندنەوەی خاوەندارێتیی موڵک و ماڵی داگیرکراو بە فەرمانی ئەنجوومەنی ناسراو بە "قیادەی سەورە"ــی هەڵوەشاوە درا.