هەڵبژاردنی دەستەی سەرۆکایەتی لە کۆبوونەوەی پێشوەختەی سەرۆکی فراکسیۆنەکان یەکلایی دەبێتەوە

ئاڤا نیوز 

 

سەرۆکی کاتی دانیشتنی پەرلەمان دەستیلەکار کێشایەوە، ئازاد حەمە ئەمین، پەرلەمانتاری یەکێتیی بەپێی ڕیزبەندی تەمەن دەبێتە سەرۆکی کاتی دانیشتن. کاندیدی یەكێتی بۆ سەرۆکی پەرلەمانیش ئاماژە بەوەدەدات کە ڕێککەوتوون لەسەر ئەوەی "لە کۆبوونەوەیەکی پێشوەختەی سەرۆکی فراکسیۆنەکان، هەڵبژاردنی دەستەی سەرۆکایەتی یەکلایی بکرێتەوە."

 

وێنە گەورەکە: 50 ڕۆژ بەسەر یەکەم دانیشتنی خولی شەشەمی پەرلەمانی کوردستان تێپەڕی، بەهۆی نەبوونی ڕێککەوتنی سیاسیی پێشوەختە بۆ جاری سێیەم دانیشتن بە کراوەیی هێڵدرایەوە، محەممەد سلێمان، سەرۆکی کاتی دانیشتن کە پەرلەمانتاری نەوەی نوێیە دووپاتیکردەوە کە چیتر ئەو ئەرکە ڕاناپەرێنێت.

 

لێدوانی فەرمی: محەممەد سلێمان پەرلەمانتاری نەوەی نوێ، دوای ئەوەی نەیتوانی دانیشتنی پەرلەمان ڕێکبخات، ڕایگەیاند، ئەمڕۆ چوارشەممە دەست لە پۆستی سەرۆکی کاتیی پەرلەمان هەڵدەگرێت و ڕادەستی دەکاتەوە."

 

لەلایەکی دیکەوە: د.میران محەممەد، یەکێک لە کاندیدانی یەکێتی بۆ پۆستی سەرۆکی پەرلەمان لە کۆنگرەیەکی ڕۆژنامەوانیدا گوتی، "لەگەڵ لایەنەکان ڕێککەوتووین لەسەر ئەوەی بەر دانیشتنی پەرلەمان کۆبوونەوەی سەرۆک فراکسیۆنەکان بکرێت و لەسەر پۆستەکانی دەستەی سەرۆکایەتی پەرلەمان بگەینە بنەمایەکی هاوبەش."

 

باکگراوند: ڕۆژی 2024-12-2 یەکەم دانیشتنی خولی شەشەمی پەرلەمانی کوردستان کرا، لەو دانیشتنەدا بۆ پۆستەکانی سەرۆک و جێگری سەرۆک و سکرتێری پەرلەمان 16 پەرلەمانتار لە یەکێتی و پارتی و نەوەی نوێ خۆیان کاندید کرد، بەڵام بەهۆی نەبوونی ڕێککەوتنی سیاسی هەڵبژاردن بۆ دەستەی سەرۆکایەتی پەرلەمان نەکرا و دانیشتنەکە بەکراوەیی هێڵرایەوە.