کۆبوونەوەی پەرلەمانی کوردستان هەڵوەشایەوە

ئاڤا نیوز 

 

بەهۆی تەواونەبوونی نیسابی یاسایی ئامادەبووان، کۆبوونەوەی پەرلەمانی کوردستان هەڵوەشایەوە، سەرۆکی کاتیش دەستبەرداری پۆستەکەی بوو.

 

وێنە گەورەکە: ئەمڕۆ چوار شەممە 22- 1- 2025 دوای بانگهێشتی سەرۆکی کاتی پەرلەمان، بەشێک لە پەرلەمانتاران چوونە هۆڵەکانی پەرلەمان تاوەکو هەڵبژاردن بۆ دەستەی سەرۆکایەتیی پەرلەمان بکرێت بەڵام تەنیا 26 پەرلەمانتار بەشدار بوون ئەمەش ڕێژەی ڕەهای پڕنەکردەوە، کۆبوونەوەکە هەڵوەشایەوە.

 

لێدوانی فەرمی: محەممەد سلێمان، سەرۆکی کاتیی پەرلەمان لە کۆنفرانسێکی ڕۆژنامەوانیدا، ڕایگەیاند: وەک ناڕازەیەتییەک لە بەرانبەر هەڵنەبژاردنی دەستەی سەرۆکایەتی، دەستبەرداری پۆستە کاتییەکەی بوو. 

زانیاریی زیاتر: بە گوێرەی پەیڕەوی ناوخۆی پەرلەمانی کوردستان، ئەگەر بەتەمەنترین پەرلەمانتار بە دەنگی زۆرینەی پەرلەمانتاران، دەستبەرداری پۆستی سەرۆکی کاتیی پەرلەمان بوو، دووەم بەتەمەنترین پەرلەمانتار سەرۆکایەتیی دانیشتنەکان دەکات تاوەکوو دەستەی سەرۆکایەتی هەڵدەبژێردرێت، بەم پێیەش لەم خولەی پەرلەماندا ئازاد محەممەد ئەمین، ئەندامی فراکسیۆنی یەکێتی دەبێتە سەرۆکی کاتیی پەرلەمان. 

 

ئەوەی پێویستە بیزانیت: ڕۆژی سێشەممە 21-01-2025، محەممەد سلێمان، سەرۆکی کاتیی پەرلەمان لە یاداشتێکدا داوای لە پەرلەمانتاران کرد، کاتژمێر 11:00ـی پێشنیوەڕۆی ئەمڕۆ چوارشەممە، 22-01-2025، لە هۆڵی پەرلەمان ئامادە ببن بۆ هەڵبژاردنی دەستەی سەرۆکایەتیی پەرلەمان.

 

زانیاریی بەدەستهاتوو: بە پێی زانیارییەکانی ئاڤا، تائێستا هیچ ڕێککەوتنێک لەنێوان لایەنە سیاسییەکان بۆ هەڵبژاردنی دەستەی سەرۆکایەتیی پەرلەمان نەکراوە، هەر چەندە بڕیار بوو لە یەکەمین کۆبوونەوەدا، دەستەی سەرۆکایەتی هەڵبژێردرێت، بەڵام بەهۆی تەواونەبوونی ڕێژەی یاسایی ڕەهای ئامادەبووان، کۆبوونەوەکە بۆ کاتێکی نادیار هەڵگیرا.