تۆمەتبارانی دزی سەدە "بە مەرج" بەر یاسای لێبووردنی گشتی دەکەون

ئاڤا نیوز

 

بڕگەیەکی یاسای لێبووردنی گشتی کە پەرلەمانی عێراق پەسەندیکرد، ئاسانکاری بۆ سزادراوانی دۆسییەکانی گەندەڵی دەکات و ئەگەر ئەو پارەیەی بردوویانە بیگەڕێننەوە، لێبووردن دەیانگرێتەوە.

 

ئەوەی پێویستە بیزانیت: بەگوێرەی بڕگەیەکی یاسای لێبووردنی گشتی هەر کەسێک بە تاوانی گەندەڵی سزادرابێت، ئەگەر کۆی ئەو پارەیەی بردوویەتی بیگەڕێنێتەوە، لێبووردنی گشتی دەیگرێتەوە.

 

لێدوانی فەرمی: یاسر هاشم حوسێنی، ئەندامی پەرلەمانی عێراق ڕایگەیاند، بەگوێرەی یاسای لێبووردنی گشتی، حکومەت لەگەڵ تۆمەتبار و سزادراوانی تایبەت بە دۆسییەکانی گەندەڵی لەوانەش تۆمەتبارانی دزی سەدە (نور زوهێر، ڕائد جوحی و هەیسەم جبووری) دەست بە دانوستان دەکات، تا لە بەرامبەر ئەو پارانەی بردوویانە لێبووردنیان بۆ دەربکرێت.

 

باکگراوند: ناوەڕاستی ساڵی 2022 دۆسیەی دیارنەمان و بەتاڵانبردنی 2.5 ملیار دۆلار لە بانکی ڕافیدەین بڵاوکرایەوە و لەسەر ئەو دۆسیەیەش چەندین کەس و بەرپرس تۆمەرتبارن و دادگا بەردەوام لێکۆڵینەوە لەسەر دۆسییەکە دەکات، تائێستاش تەنیا 270 ملیۆن دۆلار لەو پارەیە گەڕاوەتەوە و نوور زوهێریش کە تۆمەتی سەرەکی دۆسییەکەیە ئازادکراوە.