جۆن بۆڵتن: ترەمپ پاسەوانەکانی لێوەرگرتوومەتەوە

ئاڤا نیوز 

جۆن بۆڵتن ڕاوێژکاری پێشووی ئاسایشی نیشتمانی ئەمریکا ڕایگەیاند، بە بڕیاری دۆناڵد ترەمپ سەرۆکی ئەمریکا تەواوی پاسەوانەکانی لێوەرگیراوەتەوە و مەترسی لەسەر ژیانی هەیە.

چیرۆکی سەرەکی: لەگەڵ دەستبەکاربوونی، دۆناڵد ترەمپ چەندین بڕیاری بۆ کەمکردنەوەی خەرجییەکان لەسەر حکومەتی ئەمریکا داوە و یەکێک لەوانەش لابردنی خەرجی بەرپرسانی پێشووی ئەمریکایە.

لێدوانی فەرمی: جۆن بۆڵتن ڕاوێژکاری پێشووی ئاسایشی نیشتمانی ئەمریکا ڕایگەیاند: من نائومێدم، بەڵام سەرم نەسوڕماوە کە ترەمپ بڕیاری داوە پاسەوانەکانم نەهێڵێت کە پێشتر لەلایەن دەزگای خزمەتگوزاری نهێنی ئەمریکاوە دابینکرابوو.

بۆچوونی لایەنی بەرامبەر: دۆناڵد ترەمپ سەرۆکی ئەمریکا ڕایگەیاند: دۆخی ڕۆژهەڵاتی ناوەڕاستمان تەقاندەوە و بەجێمانهێشت و ژمارەیەکی زۆر لە سەربازمان لەدەستدا و خەڵکێکی زۆرمان کوشت، جۆن بۆڵتۆنیش یەکێک بوو لەو کەسانەی دەستی هەبوو لەم کارانەدا، جۆن بۆڵتن کابرایەکی گەمژە و کەلەپووتە، ناکرێت بۆ هەمیشە بپارێزرێت.

لەلایەکی دیکەوە: ئەمریکا سوپای  پاسدارانی ئێرانی بەوە تۆمەتبار کردبوو لە ساڵی 2022 پیلانیان بۆ تیرۆرکردنی جۆن بۆڵتۆن داڕشتووە، وەک تۆڵەسەندنەوەیەک لە کوشتنی قاسم سولەیمانی، فەرماندەی سوپای قودس لە ساڵی 2020 و هێشتاش مەترسییەکان لەسەر تیرۆرکردنی جۆن بۆڵتن بوونیان هەیە.

باکگراوند: جۆن بۆڵتۆن لە ساڵی 2018 تا 2019 وەک ڕاوێژکاری ئاسایشی نیشتمانی ترەمپ کاری کردووە، دوای دەستلەکارکێشانەوەی بەهۆی ناکۆکییەکانی لەگەڵ ترەمپ، کتێبێکی بڵاوکردەوە وردەکارییە هەستیارەکانی سەبارەت بە ئیدارەی ترەمپ ئاشکرا کرد و ڕەخنەی توندی لە ترەمپ گرت و بە کەسێکی نەشیاوی بۆ پۆستی سەرۆکایەتی وەسفکرد.