تا ئێستا نزیکەی 18 هەزار خێزانی ئاوارەی شنگال نەگەڕاونەتەوە ناوچەکانیان

ئاڤا نیوز

لە کۆی 170 کەمپی ئاوارەکان، تەنیا 22 کەمپ لە پارێزگاکانی هەولێر و دهۆک ماون کە 18 هەزار خێزان لەخۆ دەگرێت و زۆرینەشیان خەڵکی شنگال و هەندێکیشیان خەڵکی پارێزگاکانی دیکەن.

وێنە گەورەکە: حکومەتی عێراق بە هاوکاری هەرێمی کوردستان و ڕێکخراوی نەتەوەیەکگرتووەکان لە هەوڵەکانی بۆ داخستنی کەمپی ئاوارەکان بەردەوامە، بۆ ئەو مەبەستەش هاوکاری دارایی و کۆمەڵێک پێداویستی بۆ هەر خێزانێک دابین دەکات کە بیەوێت ئارەزوومەندانە بگەڕێنەوە بۆ ناوچەکانی خۆیان، بەڵام بەهۆی ئاسایی نەبوونەوەی دۆخی شنگال هێشتا بەشێکی زۆری ئاوارەکانی شنگال لە هەرێمی کوردستان نیشتەجێن.

لێدوانی فەرمی: کەریم نووری، بریکاری وەزارەتی کۆچ و کۆچبەرانی عێراق بە ئاژانسی هەواڵی عێراق ڕاگەیاند:

- هەوڵەکان بۆ داخستنی کەمپی ئاوارەکان و گەڕاندنەوەیان بۆ ناوچەکانی خۆیان بەردەوامە و بڕی هاوکارییەکانیش بۆ ئەوانەی دەگەڕێنەوە لە ملیۆن و نیوێک زیادکراوە بۆ 4 ملیۆن دینار.

- تەنیا 16 کەمپ لە دهۆک و 6 کەمپ لە هەولێر ماون کە 18 هەزار خێزان لەخۆدەگرن، زۆربەیان خەڵکی شەنگال و هەندێکیشیان خەڵکی پارێزگاکانی دیکەن.

لەلایەکی دیکە: سەبارەت بە هەوڵەکان بۆ گەڕاندنەوەی ئەو عێراقییانەی کە لە ئەوروپا گیریان خواردووە، ڕایگەیاند: عێراق سەرکەوتوو بوو لە گەڕاندنەوەی چوار هەزار و 500 هاووڵاتی کە لەسەر سنوورەکانی نێوان پۆڵەندا و لیتوانیا و بیلاڕووس گیریان خواردبوو.