هەرێمی كوردستان و عێراق هاوكاریی یەكتر دەكەن لە ساغكردنەوەی بەرهەمی جووتیاران

ئاڤا نیوز

هەرێمی كوردستان و عێراق، ڕۆژژمێرێكی كشتوكاڵیی یەكگرتوویان دەبێت بۆ ساغكردنەوەی بەرهەمی ناوخۆ و قەدەغەكردنی هاوردەكردن لە وەرزی پێگەیشتنی بەرهەمەكان، وەزیری كشتوكاڵی هەرێمی كوردستانیش دەڵێ ئێمە پابەندین بە ڕۆژژمێرەكە و هیوادارین عێراقیش پابەند بێت.

چیرۆكی سەرەكی: ئەمڕۆ نوێنەرانی كۆمەڵەی جووتیارانی بەسڕە و شاندێكی وەزارەتی كشتوكاڵی عێراق سەردانی وەزارەتی كشتوكاڵی هەرێمی كوردستانیان لە شاری هەولێر كرد و ئامانجی سەردانەكەش هەماهەنگیی زیاتر بوو لە نێوان هەردوو لا لە ساغكردنەوەی بەرهەمە كشتوكاڵییەكان.

لێدوانی فەرمی: بێگەرد تاڵەبانی، وەزیری كشتوكاڵ و سەرچاوەكانی ئاوی حكومەتی هەرێمی كوردستان لە كۆنفڕانسێكی ڕۆژنامەوانیدا ڕایگەیاند: دەمانەوێت لە سەرتاسەری عێراقدا یەك ڕۆژژمێری كشتوكاڵیی یەكگرتوو هەبێت ئێمە پێوەی پابەند دەبین و وەزارەتی كشتوكاڵی عێراق هاوكارمانە و هیوادارین ئەوانیش پێوەی پابەند بن.

 گوتیشی: لە ڕۆژانی داهاتوو هاوردكردنی تەماتە بۆ هەرێمی كوردستان و عێراق قەدەغە دەكرێت ئەمەش بە هۆی ئەوەی وەرزی بەرهەمهێنانی تەماتەیە و مەبەستمان بەرهەمی جووتیارانی ناوخۆ ساغ ببێتەوە و سوودیان پێبگات.