ئومێد خۆشناو: عێراق دەبوو ساڵی ڕابردوو 300 ملیار دینار بداتە هەولێر، بەڵام سێ دیناریشی نەدا

ئاڤا نیوز

 

پارێزگاری هەولێر ڕەتیدەكاتەوە عێراق پارەی بۆ هیچ پڕۆژەیەكی خزمەتگوزاری لە هەرێمی كوردستان ناردبێت و دەڵێت، 12 ساڵە پارەی پەرەپێدانی پارێزگاكانیشیان بۆ هەرێمی كوردستان ڕاگرتووە.

 

وێنە گەورەكە: حكومەتی هەرێمی كوردستان لەسەر داهاتی ناوخۆ بەردەوامە لە جێبەجێكردنی پڕۆژەی خزمەتگوزاری لە شار و شارۆچكەكانی هەرێمی كوردستان، لەنێویاندا پڕۆژەی "زۆر گرنگ و ستراتیژی"ـش
هەن.

 

لێدوانی فەرمی: ئومێد خۆشناو، پارێزگاری هەولێر لە كۆنفڕانسێكی ڕۆژنامەوانیدا ڕایگەیاند:

 

- بێبەشكردنی هەرێمی كوردستان لەلایەن عێراقەوە تەنیا لەڕووی مووچەوە نییە، بەڵكو حكومەتی عێراق هیچ بڕە پارەیەک ناداتە پارێزگاكانی هەرێمی كوردستان بۆ جێبەجێكردنی پڕۆژەی خزمەتگوزاری، سەرباری ئەوەش لە ساڵی 2013ـەوە پارەی پەرەپێدانی پارێزگاكانیشیان بۆ هیچ پارێزگایەكی هەرێمی كوردستان نەناردووە كە مافی هاووڵاتیانە.

 

- ساڵانە لە بودجەی عێراق كە لە پەرلەمان دەنگی لەسەر دەدرێت، بڕە پارەی هەر پارێزگایەك دیاردەكرێت، ساڵی ڕابردوو دەبوو عێراق 300 ملیار دینار بۆ پارێزگای هەولێر بنێرێت بەڵام  سێ دیناریشی نەناردووە.