دیداری كوردستان و بەریتانیا بۆ سنوورداركردنی كۆچی نایاسایی بەڕێوەچوو

ئاڤا نیوز 

 

لەچوارچێوەی هەوڵە هاوبەشەكانی هەردوو حكومەتی هەرێمی كوردستان و بەریتانیا بۆ بەرەنگاربوونەوەی تاوانەكانی بازرگانیكردن بە مرۆڤ و بەقاچاخبردنی پەنابەران بۆ بەریتانیا، لە شاری هەولێر دیالۆگی بەریتانیا و كوردستان بەڕێوەچوو.

 

وێنە گەورەكە: دیداری كوردستان و بەریتانیا، بە چاودێری كونسوڵخانەی بەریتانیا لەلایەن هەردوو كۆمەڵەی كوردی بەریتانیا 'UKKA' و پەیمانگەی مافە نێودەوڵەتییەكان 'IRI' بەهاوبەشی ڕێكخرابوو بەناونیشانی "بەهێزكردنی سنوور و پێكهاتەكان: بەرەنگاربوونەوەی تاوانی ڕێكخراو و كۆچی نایاسایی بۆ بەریتانیا"، تێیدا ژمارەیەك پانێڵ دەربارەی چارەسەركردنی ئاستەنگە سەرەكییەكانی تاوانی ڕێكخراو و دیاردەی كۆچی نایاسایی ئەنجامدران.

 

لێدوانی فەرمی: پارێزەر بەشدار حەسەن، بەرپرسی پلاتفۆرمی مافی مرۆڤی كۆمەڵەی كوردی بەریتانیا، كە لە هەمان كاتدا سەرۆكی پەیمانگەی مافە نێودەوڵەتییەكانە ڕایگەیاند، لەم دیدارەدا بە تێروتەسەلی گفتوگۆ لەبارەی چۆنیەتی پەرەپێدانی هاوكاری نێوان بەریتانیا و هەرێمی كوردستان كرا بۆ ڕووبەڕووبوونەوەی دیاردەی كۆچی نایاسایی، كە تێیدا ژمارەیەك كەسانی پسپۆڕ و ئەكادیمی لەبواری كۆچ و بەرەنگاربوونەوەی كۆچی نایاسایی و بازرگانیكردن بە مرۆڤ بۆچوون و سەرنجەكانی خۆیان خستەڕوو.

 

ئەوەی پێویستە بیزانیت: كۆمەڵەی كوردی بەریتانیا ڕێكخراوێكی بەریتانیە و تایبەتمەندە بە پشتیوانیكردنی ڕەوەندی كوردی، گرنگی دەدات بە پەرەپێدانی كۆمەڵگە، هۆشیاری یاسایی و بەرەوپێشبردنی كولتووری كوردی و چارەسەركردنی پێداویستییەكانی تاكەكان لەڕێگەی چەندین دەسپێشخەری و هاوكاری جۆراوجۆرەوە.