ڕێكارەكانی دامەزراندنی 500 كەسەکەی هەڵەبجە تەواو بوون

ئاڤا نیوز

ئەنجوومەنى ڕاژەى گشتى، تەواوبوونى ڕێککارەکانى دامەزراندنى 500 کەس بە شێوەى گرێبەست، بۆ فەرمانگەکانى سنوورى پارێزگاى هەڵەبجە ڕادەگەیه‌نێت.

وێنە گەورەكە: لەسەر فه‌رمانى سەرۆكوەزیران، مه‌سرور بارزانى لەپێناو دابینکردنى میلاکى پێویست بۆ دامودەزگه‌کانى سنوورى پارێزگاى هەڵەبجە، بە مەبەستى باشتر ڕاییکردنى کاروبارى هاووڵاتیيان، بڕیاردرا بە دامەزرانی 500 كەس بەشێوەی گرێبەست.

ڕاگەیێنراوی فەرمی: ماڵپەڕی فەرمیی حكومەتی هەرێمی كوردستان بڵاویكردووەتەوە، وێنەیەک لە فەرمانى ڕەزامەنديى سەرۆکایەتيى ئەنجوومەنى وەزیران، تایبەت بە دامەزراندنى 500 كەس بۆ کارى پێویست ئاراستەى ئەنجوومەنى ڕاژەى گشتى کراوە و لە ئێستادا زانیاريى پەیوەست بە شوێنى دەوامى فەرمى 500 کەسەکە لەلایەن ئەنجومەنى ڕاژەى گشتى بە فەرمى ڕەوانەى پارێزگاى هەڵەبجە دەکرێت بەمەبەستى جێبەجێکردنى ڕێکارە کارگێڕییەکانى پەیوەندیدار بە دامەزراندنیان، پاڵپشت بە پێى ڕێنمایيى ژمارە (10)ـی ساڵى 2019.

زانیاریی زیاتر: 48 کەس لە کۆى ئه‌و 500 فەرمانبەره‌، کەسوکارى پلەیەکى شەهیدان و ئەنفالکراوەکانن و لە سیستەمى خاڵبەنديى گشتى، خاڵى تایبەتیان بۆ دیارى کرابوو، وێڕاى ئەوەى ڕەچاوى (یاساى ماف و ئیمتیازاتى کەمئەندام و خاوەنپێداویستيى تایبەت) ژمارە (22)ى ساڵى 2011ـش کراوە، بە تەرخانکردنى ڕێژەى 5% لە تێکڕاى وەزیفەکان بۆ خاوەن پێداویستییە تایبەتەكان، بە شێوازێک (25) کەس لە کۆى (500) دەرچوو و خاوەن پێداویستيى تایبەتن و بە سیستەمى کۆتا دەرچوون.

ئەوەش بزانە: دەرچووان بەپێى پێداویستيى فەرمانگەکانى سنوورى پارێزگاى هەڵەبجە، 45 جۆر وەزیفەى گشتى لەئەستۆ دەگرن، بە شێوازێک بڕوانامە و بوارى پسپۆرییان لەگەڵ جۆرى کار و ناونیشانى وەزیفییان ده‌گونجێت و هیچ دەرچوویەک بە ئەرکێک هەڵناستێت لە بوارى پسپۆڕيى خۆى نەبێت بە پێى بڕوانامەکەى.