سوننەکان بۆ یەکلاییکردنەوەی بەربژێرێک کۆدەبنەوە

ئاڤا نیوز

دوای بڕیاری دادگەی فیدڕاڵی عێراق، سەبارەت بە دۆسیەی بەربژێر شەعلان کرەیم بۆ پۆستی سەرۆکی ئەنجوومەنی نوێنەرانی عێراق، نوێنەری لایەنە سوننەکان کۆبوونەوە.

وێنە گەورەکە: لایەنە سوننەکان بەبێ ئامادەبوونی محەممەد حەلبووسی سەرۆکی حیزبی تەقەدووم، لە ماڵی خەمیس خەنجەر، سەرۆکی هاوپەیمانی سیادە، بەمەبەستی یەکلاییکردنەوەی دۆسیەی سەرۆکی ئەنجوومەنی نوێنەران کۆبوونەوە. 

 

ڕاگەیێنراوی فەرمی: هەریەک لە هاوپەیمانیەکانی "عەزم و سیادە و حەسم" ڕایانگەیاندووە گەیشتوونەتە ڕێککەوتنی کۆتایی و پێویستە لە کۆبوونەوەی یەکەمی ئەنجوومەنی نوێنەرانی عێراق ئەو پرسە یەکلایی بکرێتەوە، ئەو سکاڵایەش کە لەدادگای فیدراڵی ماوە هیچ کاریگەریی لەسەر پرۆسەکە نییە و پێویستە لەو دوو بەربژێرەی دیاریکراون یەکێکیان هەڵبژێردرێن.

بۆچی گرنگە: ئەمە یەکەمین کۆبوونەوەی لایەنەکانی سوننەیە دوای ئەوەی لە 13-01-2024، دوای دوو دانیشتن پۆستی سەرۆکی ئەنجوومەن یەکلایی نەبووە، زیاتر لە سێ مانگە پۆستی سەرۆکی ئەنجوومەنی نوێنەرانی عێراق چۆڵە، هێشتا ئەنجوومەنی نوێنەران، وادەی دانیشتنی بۆ هەڵبژاردنی سەرۆکی نوێ دیارینەکردووە.

ئەوەی پێویستە بیزانیت: دوای پرۆسەی ئازادیی عێراق، پۆستی سەرۆکی ئەنجوومەنی نوێنەرانی عێراق بۆ پێکهاتەی سوننە بووە، دوایین کەس کە لە پشکی سووننەکان ئەو پۆستەی وەرگرتووە محەممەد حەلبووسی  بوو، کە رۆژی 14-11-2023، دادگای باڵای فیدراڵیی عێراق، ئەندامێتیی حەلبووسی لەسەر سکاڵای لەیس دلێمی، ئەندامی پێشووی ئەنجوومەنی نوێنەرانی عێراق هەڵوەشاندەوە.