دادگای فیدڕاڵی تاوتوێی سکاڵای هەڵوەشاندنەوەی دوو وەزارەتی هەرێمی کوردستان دەکات

ئاڤا نیوز

 

دادگای باڵای فیدڕاڵی ئەمڕۆ سێشەممە، بۆ جاری دووەم لەسەر سکاڵایەک بۆ هەڵوەشاندنەوەی وەزارەتەکانی شەهیدان و ئەنفالکراوان، ئەوقاف و کاروباری ئایینی هەرێمی کوردستان کۆدەبێتەوە.

 

چیرۆکی سەرەکی: سکاڵاکە لەلایەن کەسێک بە ناوی "خالید موستەفا حوسێن"ەوە دژی سەرۆکی پەرلەمانی کوردستان تۆمارکراوە، سکاڵاکار داوا لە دادگای باڵای فیدڕاڵی دەکات، حکومەت و پەرلەمانی هەرێمی کوردستان پابەند بکات بەوەی، دیوان بۆ مەزهەب و ئایینییەکانی هەرێمی کوردستان دروستبکەن و سەر بە ئەنجوومەنی وەزیرانی عێراق بێت، بەشێوەیەک کە دەستەی سەربەخۆبن لەڕووی دارایی و کارگێڕییەوە و بەیاسایەکی تایبەت ڕێکبخرێت.

 

زانیاریی زیاتر: وەزارەتی ئەوقاف و کاروباری ئایینی هەرێمی کوردستان بەپێی یاسای ژمارە 11ی ساڵی 2007ی پەرلەمانى کوردستان پێکهێنراوە، سکاڵاکار داوا دەکات ئەو یاسایە بە نادەستوورى هەژمار بکرێت، پەرلەمان ناچار بکرێت دیوان بۆ ئایین و مەزهەبە جیاوازەکان پێکبهێنێت و ببەسترێنەوە بە ئەنجوومەنى وەزیرانەوە

 

لەلایەکی دیکەوە: هاوکات داواکار لە سکاڵاکەى دیکەیدا داوا دەکات، دادگاى باڵاى فیدراڵى وەزارەتى شەهیدان و کاروبارى ئەنفالکراوانى هەرێمى کوردستان بە نادەستوورى بزانێت، کە بەگوێرەى یاسای ژمارە 8ى ساڵى 2006 لە پەرلەمانی کوردستان پێکهێنراوە. پەرلەمان و حکومەتى هەرێمى کوردستان ناچار بکرێن دەستەیەک بە ناوى "دامەزراوەى شەهیدان" پێکبهێنن کە سەر بە ئەنجوومەنى وەزیران بێت و لە رووى دارایی و کارگێڕییەوە سەربەخۆ بێت و یاسایەکى بۆ دەربکرێت.

 

سکاڵاکار دەڵێت، بوونی وەزارەتی لەو جۆرە دژی دەستووری عێراقە کە بەپێی دەستوور دەبێت دەستەی سەربەخۆبن.

 

باکگراوند: پێشتر دادگای فیدڕاڵی لە ڕۆژی 23-12-2024 لەسەر داواى نوێنەرى یاسایی پەرلەمانى هەرێمی کوردستان، تاوتوێکردنی ئەم سکاڵایەی بۆ ئەمڕۆ 28ی مانگ دواخست.