ئاڤا ناوی ئەندامانی لیژنەکانی دیاریکردنی کاندید بۆ پۆستی سەرۆکوەزیرانی عێراق ئاشکرا دەکات

ئاڤا نیوز

 

چوارچێوەی هەماهەنگی دوو لیژنەی پێکهێناوە بۆ دیاریکردنی کاندیدی سەرۆکوەزیران و پێکهێنانی حکومەتی داهاتوو، کە یەکێکیان بۆ هەڵبژاردنی سەرۆکوەزیران و ئەوی دیکەش بۆ دانوستان لەگەڵ لایەنە سیاسییەکانی دیکە.

 

چیرۆکی سەرەکی: دوێنێ دووشەممە 17ی تشرینی دووەمی 2025، چەند کاتژمێرێک دوای ڕاگەیاندنی ئەنجامی کۆتایی هەڵبژاردنی پەرلەمانی عێراق، سەرکردەکانی چوارچێوەی هەماهەنگی کۆبوونەوە و گەورەترین فراکسیۆنی پەرلەمانییان ڕاگەیاند کە خاوەنی زیاتر لە 150 کورسیین، دوو لیژنەشیان بۆ دیاریکردنی سەرۆکوەزیران و کارنامەی حکومەت پێکهێنا. 

 

زانیاریی بەدەستهاتوو: سەرچاوەیەکی ئاگادار لە چوارچێوەی هەماهەنگی بۆ ئاڤا میدیا وردەکاریی ئەو دوو لیژنەیەی ئاشکرا کرد کە چوارچێوەی هەماهەنگی بڕیاری لەسەر داوە بۆ هەڵبژاردنی سەرۆکوەزیران و پێکهێنانی حکومەتی داهاتوو.

 

زانیاریی تایبەت: بەگوێرەی سەرچاوەکە، لیژنەی هەڵبژاردنی سەرۆکوەزیران بریتین لە "عەممار حەکیم، هومام حەموودی و عەبد ئەلسادە فەرێجی". لیژنەی دانوستان لەگەڵ لایەنەکانی دیکەش لە "نووری مالیکی، هادی عامری، فالح فەیاز و موحسین مەندەلاوی" پێکهاتووە.

 

ئەوەی لەوبارەیەوە دەگوترێت: عامر فایز، سەرۆکی هاوپەیمانیی تەسمیم و یەکێک لە بەشداربووانی کۆبوونەوەکەی سەرکردەکانی چوارچێوەی هەماهەنگی شیعەکان دوێنێ دووشەممە لە لێدوانێکی تایبەتدا بە ئاڤا میدیای ڕاگەیاندبوو، هەموو ئەو ناوانەی لە میدیاکان وەک کاندید بۆ پۆستی سەرۆکوەزیران ناویان دەهێنرێت، ورد و ڕاست نین و لە کۆبوونەوەی چوارچێوەی هەماهەنگی باسی هیچ ناوێک نەکراوە، بەڵکو بڕیاری پێکهێنانی لیژنەیەکی ناوخۆیی درا تا هەڵسەنگاندن بۆ ناوی کاندیدەکان بکات، کاری لیژنەکەش دەستیپێکردووە.