وەزارەتی دارایی تانەکەی لە دژی هەموارکردنی یاسای پەروەردە لە دادگای فیدراڵی دەکشێنێتەوە

ئاڤا نیوز

وەزارەتی دارایی عێراق تانەکەی لە دژی یاسای هەموارکراوی پەروەردە لە عێراق کشاندەوە، ئەمەش دوای فشار و ناڕەازیەتیی بەرفراوانی پەرلەمانتاران و چینی پەروردەکاران.

 

چیرۆکی سەرەکی: ئەمساڵ یاسای پەروردە هەموارکرایەوە و چەندین ئیمتیازات و زیادکردنی مووچە و تەرخانکراوەکانی بە مامۆستایان و کارمەندانی پەروەردەیی دا، بەڵام وەزارەتی دارایی تانەی لە دژی برگەی سێیەمی ماددەی چواری یاساکە دا، ئەوەش بە گوتەی خۆی بەهۆی کەمی نەختینەیی دارایی بەردەست و پەنابردن بۆ قەرزکردن بەمەبەستی دابینکردنی دارایی مووچە.

 

نووسراوی فەرمی: ئەمڕۆ 19ی مانگ، وەزارەتی دارایی عێراق نووسراوێکی ئاڕاستەی وەزارەتی پەروەردە کردووە و ئاگاداری کردووەتەوە کە تانەکەی لە دادگەی فیدراڵی کشاندووەتەوە.

 

هۆکارە زانراوەکان: بەهۆی فشاری سەندیکای مامۆستایان و بەشێک لە مامۆستایان، وەزارەتی دارایی تانەکەی کشاندووەتەوە کە لە ئەگەری نە کشاندنەوەی تانەکە، بڕیاربوو ئەمڕۆ چوارشەممە، مانگرتنی سەرتاسەری لە ناوەندەکانی خوێندن لە عێراق ڕابگەیێنرێت و ڕۆژی یەکشەممەی داهاتوو خۆپیشاندانێکی گەورە ئەنجام دەدرا لە بەغدا.