دانوستاندنەکانی عێراق و تورکیا بۆ ڕێککەوتنێکی نوێ لەسەر بۆڕی نەوت دەستیپێدەکاتەوە

ئاڤا نیوز

وەزارەتی نەوتی عێراق ڕایدەگەیێنێت، دانوستانەکانی لەگەڵ ئەنقەرە لەسەر ڕێککەوتنی هێڵی بۆڕی نەوتی عێراق-تورکیا دەستیپێکردووەتەوە. وەزارەتەکە دووپاتی کردەوە کە دانوستانەکان ئەرێنی بوون و لێکگەیشتنەکان هەنگاوێکی گرنگن بۆ داڕشتنی ڕێککەوتنێکی نوێ کە هاوبەشی نێوان هەردوو وڵات پتەو بکات.

 

چیرۆکی سەرەکی: دووشەممە 2025-11-17، شاندی عێراق بە سەرۆکایەتیی باسم محەمەد خوزەییر، بریکاری وەزارەتی نەوت بۆ کاروباری دەرهێنان و شاندی تورکیا بە سەرۆکایەتیی ئەحمەد برات چۆنکار، بریکاری وەزارەتی وزە و سامانە سروشتییەکان، لە ئەنقەرەی پایتەختی تورکیا کۆبوونەوە.

 

ڕاگەیێنراوی فەرمی: بەگوێرەی ڕاگەیێنراوی وەزارەتی نەوتی عێراق، ئامانج لە کۆبوونەوەکە تاوتوێکردنی ڕێگاکانی گەیشتن بە ڕێککەوتنێکی نوێیە بۆ گواستنەوەی نەوتی خاو لەڕێگەی هێڵی بۆڕی عێراق - تورکیا.

 

زانیاریی زیاتر: هەردوولا جەختیان لەسەر ئەوە کردەوە کە کەشوهەوای دانوستانەکان ئەرێنی بووە و لێکگەیشتنەکان هەنگاوێکی گرنگن بۆ داڕشتنی ڕێککەوتنێکی نوێ کە هاوبەشی نێوان هەردوو وڵات بەهێز بکات و بەردەوامی پڕۆسەکانی گواستنەوە و بەدیهێنانی بەرژەوەندییە ستراتیژییە هاوبەشەکان مسۆگەر بکات.

 

ئەوەی پێویستە بیزانیت: لە 20ـی تەممووزی 2025، بە فەرمانی ڕەجەب تەیب ئەردۆغان، سەرککۆماری تورکیا، ساڵی داهاتوو 27ـی تەممووزی 2026، ڕێککەوتنی نەوتی 52 ساڵەی نێوان هەردوو حکومەتی تورکیا و عێراق بۆ گواستنەوەی نەوتی کەرکووک بۆ بەندەری جەیهانی تورکیا کۆتایی دێت و نوێ ناکرێتەوە.