پێداچوونەوە بە مۆڵەتی وەبەرهێنان دەکرێت

ئاڤا نیوز

 

دەستەی وەبەرهێنان بە هەماهەنگی  لەگەڵ دامەزراوەی دارایی نێودەوڵەتی IFC و بە هەماهەنگی لەگەڵ لایەنە پەیوەندیدارەکانی حکومەتی هەرێمی کوردستان، پێداچوونەوە بە مۆڵەتی وەبەرهێنان دەکات.

 

وێنە گەورەکە: بەپێی یاسای ژمارە 4ی ساڵی 2006ی یاسای وەبەرهێنانی هەرێمی کوردستان، زەمینەیەکی لەباری ڕەخسێندراوە بۆ وەبەرهێنەرانی ناوخۆ و بیانی بۆ بەگەڕخستنی سەرمایەکانیان لە هەرێمی کوردستان، بەڵام وەرگرتنی مۆڵەتی وەبەرهێنان کات و هەنگاوی زۆری پێویستە.

 

لێدوانی فەرمی: د. محەممەد شوکری، سەرۆکی دەستەی وەبەرهێنان گوتی:" شیکارێکی دامەزراوەیی و یاساییمان بۆ پێدانی مۆڵەتی وەبەرهێنان کردووە، دەمانەوێت نەخشە ڕێگایەک بۆ پرۆسەی پێدانی مۆڵەتی وەبەرهێنان ئامادە بکەین و ئاسانکاری زیاتر و ژینگەیەکی لەبارتر بۆ وەبەرهێنان بڕەخسێنین".

 

ئەوەی پێویستە بیزانیت: وەرگرتنی هەر مۆڵەتێکی وەبەرهێنان لە هەرێمی کوردستان، ماوەی یەک بۆ سێ ساڵ پێویستە و زیاتر لە 300 هەنگاوی دەوێت تا ڕەزامەندی لەسەر دەدرێت.

 

ژمارەکان وادەڵێن: لە ساڵی 2006ەوە مۆڵەت دراوە بە 1561 پڕۆژەی وەبەرهێنان لە هەرێمی کوردستان، لەو ژمارەیەش تەنیا لە ساڵی ڕابردوو 183 مۆڵەتی وەبەرهێنان دراوە، کە 17٪ی ئەم مۆڵەتانە بۆ وەبەرهێنەرانی بیانی بووە.

 

زانیاریی زیاتر: وەبەرهێنەرانی بیانی ڕۆڵێکی بەرچاوییان هەیە لە گەشەی ئابووری هەرێمی کوردستان و خستەگەڕی سەرمایەکەیان لە خزمەتی ئاوەدانی کوردستان قازانجێکی زۆر گەیاندووە و حکومەتیش لەوچواچێوەیە دا بەردەوامە لە جێبەجێکردنی پلانی ئاوەدانی زیاتری شار و شارۆچکەکان بەبێ جیاوازی، سەرمایەی بەگەڕخراوی وەبەرهێنەرانی بیانی زیاترە لە پێنج ملیار دۆلار بەشێوازی سەربەخۆ، هاوکات بەشێوەی هاوبەشیش مەزندەی زیاتر لە 20 ملیار دۆلاری بۆ دەکرێت.

 

سەرمایەی وەبەرهێنان:  لەسەر ئەو بنەمایە، بەڕێژەی 63.04% ی تێکڕای سەرمایەی وەبەرهێنان لە هەرێمی کوردستاندا، سەرمایەی نیشتمانییە، هاوكات ڕێژەی 36.69% گوژمەی وەبەرهێنان لە سەرمایەی بیانی پێکدێت، ئاستی وەبەرهێنانی هاوبه‌ش سەرمایەگوزاریه‌كه‌ی لە 0.27٪ وەبەرهێنان لە هەرێمی کوردستاندا پێكده‌هێنێنن.