نوێترین زانیاری لەبارەی مووچە؛ چی ماوە بکرێت بۆ خەرجکردنی؟

ئاڤا نیوز

کارکردن لەسەر ئامادەکردنی داواکارییەکانی بەغدا لەبارەی پرسی مووچە بەردەوامە، بۆ ئەوەی سەرجەمیان بۆ کۆبوونەوەی هەینی ئامادە بکرێن بە ئامانجی واژۆکردنی ڕێککەوتنێکی نوێ و خەرجکردنی مووچەی مانگی یەک.

چیرۆکی سەرەکی: ناوەڕاستی هەفتەی ڕابردوو دوو لیژنەی تەکنیکی وەزارەتی دارایی عێراق سەردانی هەولێریان کرد، یەکێکیان لیژنەی بەڕێوەبەرایەتیی ژمێرکاری و ئەوەی دیکەیان لیژنەی خانەنشینی بوو، لەگەڵ تیمە تەکنیکییەکانی کوردستان کاریان لەسەر ئامادەکردنی داواکارییەکانی بەغدا دەکرد.

زانیاریی تایبەت:  ئەمڕۆ لیژنە ژمێرکارییەکە گەڕاوەتەوە بەغدا و کارەکانیان تەواو کردووە، بەڵام لیژنەی خانەنشینی لێرە ماونەتەوە و هێشتا کارەکانیان تەواو نەبووە. جێبەجێکردنی داواکارییەکانی بەغداش بەم قۆناغە گەیشتوون:

٠ لیستی مووچەی مانگی یەک ئامادە کراوە و هەموو داواکارییەکانی بەغدا جێبەجێکراون.

٠ هێشتا لیستی مووچەی خانەنشینیان تەواو نەبووە و کاری لەسەر دەکرێت.

٠ تەرازووی پێداچوونەوە (میزان موراجەعە)ی مانگی 12ـی ساڵی ڕابردوو ئامادەیە و تەواو بووە.

هەنگاوی داهاتوو: بڕیارە ڕۆژی هەینی 31-1-2025 لە ماڵی د.فوئاد حسێن، وەزیری دەرەوە و سەرۆکی ئەنجومەنی باڵای ئابووریی عێراق لە بەغدا، جارێکی دیکە شاندی هەرێمی کوردستان و وەزارەتی دارایی عێراق کۆببنەوە، بە ئامانجی گفتوگۆکردن لەبارەی ڕێککەوتنێکی نوێ بۆ خەرجکردنی مووچە لەمساڵدا.

 

لەلایەکی دیکەوە: ڕێباز حەملان، بریکاری وەزارەتی دارایی عێراق، ئەمڕۆ سێشەممە لەسەر ڕاسپارەی سەرۆکوزیران مەسرور بارزانی سەردانی محەممەد شیاع سوودانی کردووە و پەیامی مەسرور بارزانی و حکومەتی هەرێمی کوردستانی لەبارەی مووچە و شایستە داراییەکان پێگەیاندووە.

 لە پەیامەکەدا داوا کراوە هەرێمی کوردستان لە چوارچێوەی دەستوور وەک هەرێم مامەڵەی لەگەڵ بکرێت. داوای ئەوەش کراوە یاسای بودجە و بریارەکانی دادگای فیدراڵی وەک خۆی بچێتە بواری جێ بەجێکردن بەتایبەت شایستە داراییەکانی هەرێمی کوردستان.