بریكاری وەزارەتی پێشمەرگە: مانگی سێ یەكەكانی حەفتا و هەشتا دەچنە چوارچێوەی وەزارەتی پێشمەرگە

ئاڤا نیوز

بریكاری وەزارەتی پێشمەرگەی حكومەتی هەرێمی كوردستان ڕەتی دەكاتەوە كە پلان هەبێت هەردوو فەرماندەیی پێشمەرگەی زێرەڤانی و بەرگری و فریاكەوتن بخرێنە سەر وەزارەتی پێشمەرگە و دەڵێ هەر لە وەزارەتی ناوخۆ دەمێننەوە، ئاشكراشی دەكات كە مانگی سێی داهاتوو، یەكەكانی حەفتا و هەشتای پێشمەرگە یەكدەخرێن و دەبن بە فەرماندەیی دەڤەر.

وێنە گەورەکە: کابینەی نۆی حکومەتی هەرێمی کوردستان کاری زۆری کرد بۆ یەکگرتنەوەی هێزەکانی پیشمەرگە، بەپێی ئەو لێکتێگەیشتنەش کە وەزارەتی پێشمەرگە و هێزەکانی هاوپەیمانان کردوویانە، تاوەکو ساڵی 2026 دەبێت هەموو هێزەکانی پیشمەرگە یەکخرابن، بنەمای سەرەکی بۆ بەردەوامی هاوکارییەکانی هاوپەیمانانیش بۆ پێشمەرگە، جێبەجێکردنی ئەو خاڵەی ڕێککەوتنەکەیە.

لێدوانی فەرمی: عەبدولخالق باپیری، بریكاری وەزارەتی پێشمەرگە لە كۆنفڕانسێكی ڕۆژنامەوانیدا ڕایگەیاند:

 

- وەزارەتی پێشمەرگە لە قۆناغی پرۆسەی چاكسازیدایە و ئەو پرۆسەیە زۆر گرنگە بۆ ڕێكخستن و یەكخستنی هێزی پێشمەرگە هەر بۆیە چەندە تواناكانی پێشمەرگە پێشبخرێت هێندە باشتر لە ئامادەباشیدا دەبن بۆ پرۆسەی ڕیفۆڕم و پاراستنی خاكی هەرێمی كوردستان.

- پڕۆسەی چاكسازیی هێزەكانی پێشمەرگە زۆر بە باشی دەچێتە پێش و لە مانگی سێ، هەردوو یەكەی حەفتا و هەشتا لە شێوەی فەرماندەیی دەڤەر دەچنە نێو چوارچێوەی وەزارەتی پێشمەرگە، ئێستا شەش فرقەی هاوبەش پێكهێندراوە.

- ئەگەری ئەوە هەیە پێش ئەو وادەیەی كە هاوپەیمانان دیاریان كردووە بۆ یەكگرتنەوەی پێشمەرگە كە سەرەتای ساڵی داهاتووە، یەكگرتنەوەی تەواوی هێزەكانی پێشمەرگە ڕابگەیێنرێت.

- هەردوو فەرماندەیی پێشمەرگەی زێرەڤانی و بەرگری و فریاكەوتن هەر وەك خۆیان و لەسەر وەزارەتی ناوخۆ دەمێننەوە و ناچنە سەر وەزارەتی پێشمەرگە.

- هاوكارییەكانی هاوپەیمانان بۆ پێشمەرگە بەردەوامە و هیچ بڕیارێك نەدراوە بۆ وەستاندنی.