پەرلەمانی عێراق بۆ دەنگدان لەسەر هەمواری یاسای بودجە کۆدەبێتەوە

ئاڤا نیوز

یەکشەممەی داهاتوو بۆ دەنگدان لەسەر هەمواری یاسای بودجە و دوو پرۆژە یاسای دیکە ئەنجوومەنی نوێنەرانی عێراق کۆدەبێتەوە.

 

وێنە گەورەکە: دوای چەند جارێک لە دروستکردنی بەربەست لەبەردم تێپەڕاندنی هەمواری یاسای بودجە ئەوەی پەیوەندی بە هەناردەی نەوتی هەرێمی کوردستانەوە هەیە. دواجار لە کۆبوونەوەی شەوی چوارشەممەی نێوان سەرۆکوەزیران و سەرۆکی فراکسیۆنەکان لێکتێگەشتنێکی گشتیی پەسەند کرا بۆ تێپەڕاندنی هەمواری یاسای بودجە.

 

بۆچی گرنگە: بەگوێرەی هەمواری بڕگەی (ج) ماددەی 12 لە یاسای بودجە، تێچووی بەرهەمهێنان و گواستنەوەی نەوتی کوردستان لە 6 دۆلارەوە بۆ 16 دۆلار زیاد دەکرێت، لەسەر ئەو بنەمایەش بڕیارە هەناردەی نەوتی هەرێمی کوردستان ڕاستەوخۆ دەستپێبکاتەوە.

 

بڵاوکراوەی فەرمی: بەپێی کارنامەی دانیشتنی ڕۆژی یەکشەممە 2-2-2025، دانیشتنی پەرلەمان دەکرێت و چوار بڕگە لەخۆی دەگرێت.

 

یەکەم: دەنگدان لەسەر هەمواری یاسای بودجەی گشتی فیدراڵی بۆ ساڵەکانی 2023-2024-2025.
دووەم: دەنگدان لەسەر پێشنیازە یاسای هەمواری یەکەمی یاسای بنەماکانی هاوتاکردنی بڕوانامە و پلە زانستییەکان.
سێیەم: دەنگدان لەسەر بڕیار بەشێوەی ڕاسپاردە بۆ وەزارەتی پەروەردە.
دەنگدان: خوێندنەوەی دووەم بۆ پێشنیازە یاسای خوێندنی باڵا-ناحکومی.

 

لێدوانی فەرمی: دوای کۆبوونەوەکە ڤیان سەبری، سەرۆکی فراکسیۆنی پارتی لە پەرلەمانی عێراق سەبارەت بە ناوەڕۆكی كۆبوونەوەكە بە ئاڤا میدیای ڕاگەیاند: لە کۆبوونەوەکە لێکتێگەشتنێکی گشتیی پەسەند کرا بۆ تێپەڕاندنی هەمواری یاسای بودجە تایبەت بە دووبارە دەستپێکردنەوەی هەناردەی نەوتی کوردستان.

 

ئەوەی پێویستە بیزانیت: چوارشەممە 29-1-2025، لە ماڵی محەممەد شیاع سوودانی، سەرۆكوەزیرانی عێراق، لە شاری بەغدا سەبارەت بە هەموارکردنەوەی یاسای بودجە و پرسی مووچەی خەڵکی کوردستان كۆبوونەوە لە نێوان سوودانی و سەرۆک و جێگرانی سەرۆکی پەرلەمانی عێراق و سەرۆکی سەرجەم فراکسیۆنەکانی پەرلەمانی عێراق كرا.