ئاڤا بەدواداچوون بۆ گرفتی كارەبای ناوچەی پیشەسازیی باكوور دەكات

ئاڤا نیوز

ئاڤا بەدواداچوون بۆ گرفتی کارەبای نیشتمانی ناوچەی پیشەسازی باکوور لە شاری هەولێر دەکات کە سێ ڕۆژە بێ کارەبان. بەڕێوەبەریی گشتی كارەبای هەولێریش ڕایدەگەیێنێت کە لە دوو ڕۆژی داهاتوو کێشەکەیان بۆ چارەسەر دەکرێت و کارەبایان بۆ دەگەڕێتەوە.

چیرۆكی سەرەكی: ماوەی 3 ڕۆژە دووكانەكانی ناوچەی پیشەسازی باكوور (صناعەی شیمالی) كارەبایان نییە، فیتەرەكان لە سەعات 8 و 9 ـی بەیانییەوە شوێنەکانیان دەكەنەوە و تا درەنگانی شەو بێ كارەبان، واتە لە كاتی ڕۆژ و گەرمەی كاركردندا كارەبایان نییە، ئەوەش كاریگەریی ڕاستەوخۆی لەسەر كار و پیشەیان دروستكردووە و ئیشی بەشێك لە فیتەرەكان بەتەواوی پەكی كەوتووە بەهۆی ئەوەی پیشەکەیان پێویستی بە وزەی كارەبایە بۆ هەڵكردنی ئامێرەكان.

ئەوەی پێویستە بیزانیت: بەشێك لە وەستاكان ناچارن بۆ ڕاپەڕاندنی كاروباری ڕۆژانەیان، موەلیدەی خۆیان هەڵبكەن، ئەمەش وا دەكات خەرجییەكی زۆر لەسەریان بكەوێت.

ئەمەش بزانە: فیتەرەكان هانایان بۆ ئاڤا هێناوە تا بزانن هۆكاری گرفتەكە چییە و داواش لە بەڕێوەبەرایەتیی كارەبای هەولێر دەكەن لە زووترین كاتدا گرفتەکەیان بۆ چارەسەر بكرێت.

لێدوانی فەرمی: ئاڤا لەسەر داوای ئەو دووكاندارانە بەدواداچوون بۆ ئەو گرفتە دەكات، ئەندازیار بەختیار قاسم، بەڕێوەبەریی گشتی كارەبای هەولێر تایبەت بە ئاڤا ڕایگەیاند:

- بڕینی كارەبای ناوچەی پیشەسازی باكوور و گەڕەكەكانی دەوروبەری، پەیوەندی بە چاككردنەوە و ڕێكخستنەوەی سیستەمی كارەبا هەیە بۆ ئەوەی تۆڕی كارەبای 24 كاتژمێرییان بۆ تەواو بكرێت.

- كارەكانی صیانە و ڕێكخستنەوەی تۆرەكان بەنزیكەیی تەواوبووە و ڕەنگە ڕۆژی شەممە ئەو گرفتە چارەسەر ببێت و كارەبایان بۆ دەگەڕێتەوە.