تەیف سامی توانجێک لە شاندی کوردستان دەدات

ئاڤا نیوز 

تەیف سامی جاری ڕابردوو توانی لە شاندی کوردستان داوە کە زۆرن، ئەمجارەش شاندێکی گەورەتر دەچێتە بەغدا و لە 19 کەس پێکهاتووە.

 

چیرۆکی سەرەکی: ئەمساڵ تەنیا جارێک شاندی کوردستان بۆ مووچە چووەتە بەغدا، کاتەکەشی 19-1 بوو و ڕۆژێک دواتر لەگەڵ تەیف سامی و وەزارەتی دارایی عێراق کۆبوونەوە لە ماڵی د.فوئاد حوسێن، وەزیری دەرەوە و سەرۆکی ئەنجوومەنی ئابووریی عێراق، ئەوکات تەیف سامی بە توانجەوە بە شاندی کوردستانی وتووە زۆرن و ئەم هەمووە بۆچی هاتوون شوێنمان نییە لێی دانیشین.

هۆکارە زانراوەکان: حکومەتی هەرێمی کوردستان دەیەوێت هەموو بیانووەکانکی بەغدا ببڕێت لەبارەی قوتی خەڵکی کوردستان، هەرچەندە ئەمجارە لە ئامادەکردنی لیستەکان و داواکارییەکان هەموو بیانووەکانی بڕیون، تەنانەت دوو تیمی بەغدا خۆیان لە ئامادەکردنی بەشدار بوون، بەڵام هەر وەکو ئەگەرێک، هەر بەرپرس و بەڕێوەبەرێکی گشتی پەیوەندی بە مووچەوە هەیە دەچن، بۆ ئەوەی لەوێ هەر بیانووێکیان گرت یان هەر پرسیارێک هاتە پێشەوە، دەستبەجێ بە بەڵگە وەڵامی بدەنەوە. 

ئەمەش بزانە: شاندی کوردستان ئەمڕۆ جارێکی دیکە چووە بەغدا و بڕیارە سبەی هەینی هەر لە ماڵی د.فوئاد حوسێن جارێکی دیکە کۆببەنەوە، بەڵام شاندی ئەمجارەی کوردستان لە ڕابردوو گەورەترە و 19 کەسن، هەر بەرپرسێکی حکومەت لە ئەنجوومەنی وەزیران و هەر بەڕێوەبەرێکی گشتی پەیوەندی بە مووچەوە هەبێت ئەندامی شاندەکەیە.