ترەمپ: گومرکی سەر بریکس 100% زیاد دەکەم

ئاڤا نیوز

دۆناڵد ترەمپ، سەرۆکی ئەمریکا، هەڕەشەکانی بۆ سەر وڵاتانی ئەندام لە ڕێکخراوی بریکس دووبارە کردەوە و ڕایگەیاند، گومرکی 100%ـیان بە سەردا دەسەپێنێت.

ئەوەی پێویستە بیزانیت: بریکس هەر یەکە لە وڵاتانی بەڕازیل، ڕووسیا، هیندستان، چین و ئەفریقای باشوور لەگەڵ چەند وڵاتێکی دیکەی وەک ئێران و ئیمارات لە خۆدەگرێت کە دەیانەوێت لە بازرگانیی نێوانیاندا پەرە بە دراوێکی دیکە جگە لە دۆلار بدەن.

ڕاگەیێنراوی فەرمی: ترەمپ لە ڕاگەیێنراوێکدا لە تۆڕی کۆمەڵایەتیی سۆشیاڵ تروس کە ترەمپ خۆی خاوەندارێتی دەکات، ڕایگەیاند: ئەو سەردەمە بەسەرچوو کە بریکس بیەوێت ڕووبەڕووی دۆلار ببێتەوە و ئەمریکاش بێدەنگ بێت و لە دوورەوە سەیر بکات، ئەوانەی بیر لەوە دەکەنەوە ڕووبەڕووی سزا و گومرک دەبنەوە و لە بازاڕی ئەمریکی دوور دەخرێنەوە.

ئەمەش بزانە: ئەم هەڕەشانەی ترەمپ لە کاتێکدان کە بڕیارە لە سەرەتای مانگی شوباتەوە گومرکی 25%ـی بە سەر کەنەدا و مەکسیکدا بسەپێنێت.