ڕووسیا؛ ئۆکراینا بە کوشتنی 22 گوندنشین تۆمەتبار دەکات

ئاڤا نیوز

ڕووسیا ڕایگەیاند هێزەکانی ئۆکراینا  لە نێوان مانگەکانی سێپتێمبەر و نۆڤەمبەری ساڵی ڕابردوودا، 22 کەسیان لە گوندێکی ناوچەی کورسک لە ڕۆژئاوای ڕووسیا کوشتووە.

ڕاگەیێنراوی فەرمی: کۆمیتەی لێکۆڵینەوەی ڕووسیا دەڵێت: لە ناو کوژراوەکاندا 8 ژن هەن کە بە گوێرەی ڕاپۆرتەکان بەر لەوەی بکوژرێن دەستدرێژییان کراوەتە سەر.

لەلایەکی دیکەوە: ڕووسیا پێنج سەربازی ئۆکراینی بە کوشتنی ئەو 22 کەسە تۆمەتبار دەکات و دەڵێت یەکێکیان بە ناوی 'یێڤگینی فابریسێنکۆ' دەستگیر کراوە.

ئەوەی پێویستە بیزانیت: لە مانگی ئابی 2024ـەوە ئۆکراینا ناوچەی کورسکی ڕووسیای داگیر کرد، هەرچەندە ڕووسیا چەند شارۆچکەیەکی ئەو ناوچەیەی کۆنترۆڵ کردنەوە، بەڵام هێشتا چەند بەشێکی لە ژێر دەستی ئۆکراینادان.