مەشهەدانی: هەمواری یاسای بودجە پەسەند دەکرێت

ئاڤا نیوز

 

ئەمڕۆ یەکشەممە کۆبوونەوەی پەرلەمانی عێراق سەبارەت بە دەنگدان لەسەر هەمواری یاسای بودجەی گشتیی فیدراڵی بۆ ساڵەکانی 2023، 2024 و 2025 دەکرێت و وا چاوەڕواندەکرێت تێپەڕێنرێت.

 

لێدوانی فەرمی: مەحموود مەشهەدانی، سەرۆکی پەرلەمانی عێراق بە ڕۆژنامەی "سەباح"ی ڕاگەیاند: دوای گفتوگۆی فراوان، لە سەرۆکایەتیی پەرلەمان لەگەڵ سەرۆکی فراکسیۆنەکان و سەرۆکی لیژنەکانی پەرلەمان ڕێککەوتین بۆ تێپەڕاندنی ئەو دەقەی هەمواری یاسای بودجە کە حکومەتی عێراق ناردوویەتی.

 

بەتەنیشت ئەم بابەتەوە: لەم خولەی یاساداناندا خوێندنەوە و تاوتوێکردنی چەندین یاسا و بڕیار پەسەند دەکرێن، لەوانەش یاسای خانەنشینی و یاسای حەشدی شەعبی.

 

زانیاریی زیاتر: موحسین مەندەلاوی، جێگری یەکەمی پەرلەمانی عێراق سەرۆکایەتی دانیشتنەکەی ئەمڕۆی پەرلەمان دەکات، ئەوەش بەهۆی ئەوەی مەشهەدانی بە یاوەری شاندێک سەردانی ئێران دەکات.

 

ئەوەی پێویستە بیزانیت: پەرلەمانی عێراق لەپاڵ دەنگدان لەسەر هەمواری بودجە، دەنگ دەدات لەسەر پێشنیازە یاسای هەمواری یەکەمی یاسای بنەماکانی هاوتاکردنی بڕوانامە و پلە زانستییەکانی عەرەبی و بیانی. هاوکات دەنگ لەسەر بڕیار بەشێوەی ڕاسپاردە بۆ وەزارەتی پەروەردە بۆ کارکردن بە سيستمى پەڕینەوە (عبور) لە خوێندن دەدرێت و خوێندنەوەی دووەمیش بۆ پێشنیازە یاسای خوێندنی باڵا-ناحکومی دەکرێت.